Goreyê agahîyanê ke ameyê girewtene şaristanê Limburgî yê Belçîka de, wexto ke wesayîtê kurdan şayîya Newroze ra agêrayêne tay tirkanê faşîstan alê serê wesayîtan kerdê bahane û verê keyeyêkê rojawanijî de sloganê nîjadperestî vatî. 

Nîjadperestan zerar da wesayîtanê verê keyeyî û kerd ke keye bivêşnê. Keyeyo ke Rojawanê Kurdîstanî ra yo wextêk keye de rehîn mend.

Nîjadperestan hêrişê konvoyê kurdan zî kerd, xeylêk wesayîtî texrîb kerdî û hêrişê bi desan kesan kerd.

Goreyê agahîyanê ke medyaya dîjîtale de ameyê parekerdene, nîjadperestan bi tekbîran waşt ke debikewê keyeyê rojawanîjî la polîsan ê asteng kerdî.

Dîya zanayene ke hêriş de tay kesî birîndar bîyê, ameyî lînçkerdene û tay kesî zî erdî ser de bêhereket derg bîyêne. Ame parekerdene ke hema zî tay kurdan ra xeberêke nêna girewtene.

Dîmenan de aseno ke nîjadperestan sembolê kurdan û Ala Rengîne vêşnayêne. Nîjadperestan wesayîtan ra malê kurdan xesp kerdî. 

Dima ke serebût eşnawîya kurdan warê serebûtî de hêriş protesto kerd û keyeyo rojawanij bi asayî bîna ra vet.

Çalakîya protestoyî de ame waştene ke nîjadperestî wa cade bitepişîyê. Medyaya dîjîtale de fotografê tay nîjadperestan ameyî vilakerdene.

Serebûtî ra dima xeylêk polîsî sewqê cayî bîyî û herême ser de helîkopterê polîsan gêra.