Sîyasetmedarê swîsreyîjî, Wekîlê Parlamentoyê Kantonê Ticinoyî û paştgîrê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' Dr. Beppe Savaryî cewab da persanê ajansê ma.

Savaryî bale ante serebûtanê Sûrîye ser û vat: ''Beşar Esad cara qetî nêbibi dostê kurdan. Hêrişê vera Rojawanî kerdişanê ci yê verênan ra bibi. HTŞ zî seba demokrasîyî cayê bawerkerdişî nîyo. Erdogan zî paştî dano nê çeteyan. Kurdî rûmetê merimatîye pawenê. No yew sloganê ma nîyo. Raştîye ya. Ma raştîya ke waran de yena dîyene anê ziwan.''

Savaryî da zanayene ke Rayber Apo hema zî tecrîdkerde yo û vat: ''Birêz Ocalan her çiqas tecrîdkerde bibo zî fikrê ey hê dinya ra vila benê. Ocalan pênaseyê nasnameyî keno. Ey tena têkoşîno çekdar nêkerd esas, îradeyê têkoşînê demokrasîyî zî îfade kerd. O alternatîfan pêşkêş keno û pêşnîyazê dîyalogan keno. No zî mojneno ke o demokrasî de israr keno.''

Dr. Savaryî aed ziwan ke sîstemê demokrasîyê raştikênî Rojawan de yo û ganî modelê Rojawanî bêro pawitene. Savaryî vat: ''Rojawan de Tirkîya krîzan giranêr kena. Tirkîya bi çeteyanê xo vera Rojawanî şer kena. Êyê ke ewro verê hêrişanê Tirkîya de bêveng ê zî înan 100 serrî verî bi Lozanî Kurdîstan parçe kerdibi. 

Rojawan ewro pozîsyonêkê stratejîkî de yo. Herêmêka transît a. Coka ganî dîyalogê bi Rojawanî dewam bikerê. Kurdî Rojhelatê Mîyanênî de dîyarker ê.''

Savaryî vist vîrî ke DEM Partî bi Rayber Apoyî pêvînayîşî kerdê û vat: ''Ocalanî vato ke o seba dîyalogan amade yo. ŞArê kurdî zî paştî daye rayberê xo. Şar zaf perwerê Ocalanî yo. Coka eke Tirkîya de kurdan reyde dîyalogî do bêrê kerdene muxatabo verên Ocalan o. Kurdî do serkewtişêkê pîlî bivisnê destî. Teyna wa têkoşînê xo dormeyê fikranê Ocalanî de dewam bikerê. Ez bineyk bi kurdkî zana; Bijî Apo, bijî Kurdistan û Jin, Jiyan, Azadî."