Almanya de serra 30. ya qedexeyê serê PKKyî de bi hezaran kesan vera qedexeyî rayraşîyayîşêk kerd. Bi hezaran kesan waşt ke wa qedexeyê PKKyî bêro wedaritene. Çalakîkeran hêrişê îşxalî û qirkerî yê dewleta tirke şermezar kerdî.
Bi şîarê ''Qedexeyê vera PKKyî wedarnê, verê haştîye abikerê'' (Den weg für Feieden ebnen, PKK-Verbot Aufheben) qedexeyê vera PKKyî yo 30 serre paytextê Almanya Berlin de yeno protestokerdene. 26ê teşrîna peyêne ya 1993yî de Wezîrê Karanê Teberî yê ê çaxî Kanterî bi bultenêkê 53 rîpelan PKK qedexe kerdbi.
Bi beşdarî û destekê dezgehanê sey KON-MEDî, Antîfa, Interventionistische Linke, Linksjugend (Ciwananê Çepgîran) û Partîya Çepe rayraşîyayîş ame kerdene. Rayraşîyayîş de ame waştene ke qedexeyê vera PKKyî bêro wedaritene û sîyasetê krîmînalîzkerdişê kurdan wa biqedo.
Rayraşîyayîş de verî Hemsereka FED-KURDî Niştimane Tarhan qisey kerd û vat: ''Ma ewro tîya de yê û her kes zaneno ke çira ma tîya de yê. PKK şar o, şar tîya de yo.''
Hemserekê FED-KURDî Kerem Gokî zî îfade kerd ke qedexeyê vera PKKyî zerar dano şarê kurdî û vat: ''Qedexeyê vera PKKyî yeno manaya qedexeyê vera pêro şarê kurdî. Ma venga dewleta Almanya danê ke şarê kurdî rê hûrmet bikerê. Dewleta tirke bi hêzê nê qedexeyî çekanê kîmyewîyan şuxilnena.''
Hemsereka KON-MEDî Zubeyde Zumrut vat: ''Almanya PKKyî qedexe kena la dewleta tirke ya ke hêrişê kurdan kena ci rê çekan roşena, çekanê kîmyewîyan roşena.''
Hemserekê KON-MEDî Engîn Severî vat: ''PKK 45 serrî yo nasnameyê şarê kurdî yo. Senî ke şarê kurdî vano PKK şar o şar tîya de yo. Ewro paytextê Almanya Berlinî de şar tîya de yo. Wa çew nê îdareyî qedexe nêkero.''
Avûkat Lukas Theuneyo ke seba wedarîyayîşê qedexeyê vera PKKyî muracat kerdbi vat: ''PKK seba azadîya cinîyan, demokrasî, ekolojî û heqanê merdiman girîng o. Wa hukmatê Almanya nê qedexeyî wedarno. Dewleta tirke sivîlan qetil kena. Wa Almanya peynîya polîtîkaya krîmînalîzkerdişê kurdan bîyara!''
Dima nameyê şorişgêranê Îranî û PYDyî ser o qiseykerdişî ameyî kerdene. Qiseykerdişan ra dima Hozan Comert û Neşwan Herikî vejîyayî sehne ser. Girse wexto ke Kottbusser Damm û Gorlitzer Bahnhofî ra şîyêne fîşekê hewayî ameyî eştene.
Çalakîye de vera sloganê sey Bijî Serok Apo”, “Bijî berxwedana gerîla”, “Bijî berxwedana Kobanê”, “Faşîst Erdogan”, “Kiştox Erdogan”, “Bijî azadî”, “Bijî Rojava”, “Weg den Verbot mit dem PKK”, “Jin jin jiyan azadî” û “Hoch die internationale Solidaritat” ameyî vatene.
