Paytextê Almanya Berlîn de girewteyanê şorişgeran reyde çalakîya paştdayîşî ameye viraştene. Kurdistan, Fîlîstîn, Îran, Bask, Tirkîya, Katalonya û Dewletê Yewbîyayeyî yê Amerîka (DYA) ra zaf kesî tewrê çalakîya Hermanplatzî bîyî.

Mîtîngê enternasyonalî yê girewteyanê şorişgeran reyde çalakîya paştdayîşî de, pankart û posterê şorişgeranê Fîlîstîn, Kurdistan, Tirkîya, Katalonya û Dewletê Yewbîyayeyî yê Amerîka yê ke hetê rejîmanê dîktator û zordaran ra ameyê tewqîfkerdene, ameyî akerdene.Welatperweranê Kurdan zî pankanta bi nuşteyê “Ocalanî rê azadîye - Sere berz ke” û pankarta seba xoverdayoxanê grevê vêşanîye akerde.

Mîtîng de Hemsereka NAV-DEM'î ya Berlînî Melek Yûla qiseykerdişêk kerd. Yûla hovîtîya ke dewleta Tirkî û rejîmê AKP’yî yo faşîst Kurdistan de keno ard vîrî û bale ante serê tecrîdkerişê Rayberê Şarê Kurdî Abdullah Ocalanî.Yûla ard ziwan ke, ê paştdayîş danê heme dewayan ê şaran ê dinya yê ke seba azadîye têkoşîn kenê û vat, “Vera îşkence û tecrîdkerdişê Rayberê Şarê Kurdî 4 mengan ra zêde yo ke grevê vêşanîye yenê viraştene. Ma vengdayîş heme merdimîye rê kenê ke  dewaya azadîye ya Kurdistanî rê û waştişê seba azadîya Rayber Apoyî û des hezar girewteyanê sîyasîyî rê wayîr bivejîyê.”

Mîtîng de Mûmîa Ebu Cemal ra heta Abamîel Gûzman û Rayberê Şarê Kurdî Abdullah Ocalanî azadîye seba heme girewteyanê şorişgeran ê her cayê dinya ameye waştene. Peynîya mîtîng de zî marşê şorişgerîye ameyî vatene û sloganî ameyî qîrîyayene.