Bi vengdayîşê KON-MEDî paytextê Almanya Berlin de verê konsolosxaneyê Amerîka de hêrişê îşxalî yê deweleta tirke ameyî protestokerdene.

Bi seyan kesê ke verê konsolosxaneyê Amerîka de ameyî têhet bi pankart û sloganan hêrişê îşxalî û bêvengîya welatanê Ewropa ameyî şermezarkerdene. Tay çalakîkeran onlîgê  sey kefenanê gonînan dayî xo ra bale ante qirkerdişê vera kurdan ser.

Eşkerayîye de xoverdayîşê zîndanan û koyan ame selamkerdene  û mesajê pîlkerdişê têkoşînî ameyî  dayene. Badê eşkerayîye çalakîkerî 5 deqeyî erdî de qeldîyayî ra û dima ra bi slogana ''Bicîwîyo Rayber Apo'' wiriştî pay.

Hemsereka KCDK-E Fatoşe Goksungura ke tîya qisey kerd vera bêvênîya Ewropa hersê xo ard ziwan û vat: ''Ma raştê qirkerdişan yenê la heme dinya hîrê meymûnan kay kena.''

Hemserekê FED-KURDî Kerem Gokî zî bale ante serrgêra Peymana Lozanî ser û vat: ''Ma tîya ra reyna vanê ke heta ke Kurdîstan û Rayberê Şarê Kurdî azad nêbê û operasyonê vera gerîlayan nêqedîyê xoverdayîşê ma do dewam bikero.''

Hemsereka KON-MEDî Zubeyde Zumrut zî veng da PDKyî vat: ''Ewro dewleta tirke, NATO û Amerîka vanê ê dostê Barzanî û dişmenê gerîlayan ê. La eke Metîna, Zap û Qendîl de gerîlayî çînêbê. Emrê Barzanî 24 saet o. Vera qirkerdişê kurdan ganî ma xover bidê.''

Çalakîye de bi sloganan azadîya Rayberê Şarê Kurdî Abdullah Ocalanî ameye waştene. Hunermendo kurd Hozan Aydinî zî bi deyîranê xo şorişgêran reng da çalakîye.