Berlin de şehîdî ameyî yadkerdene

Gerîlayê şehîdî Navdar Serhat û Sila Hêjar paytextê Almanya Berlin de ameyî yadkerdene.

Paytextê Almanya Berlin de gerîlayê ke Xoverdayîşê Serdemî de şehîd bîyî Navdar Serhat (Davut Ozsular- 12ê nîsana 2018î) û Sila Hêjar (Cemîle Uçar-24ê nîsana 2018î) serrgêra şehadetê xo de ameyî yadkerdene.

Merasîmê yadkerdişî hetê Komîsyonê Keyeyanê Şehîdan ê Berlinî ra Merkezê Komelê Kurdan de ame serûberkerdene û bi deqayêkê rêzgirewtişî dest pêkerd.

Keyeyê Şehîd Navdarî tewrê merasîmî bi. Sîyasetmedara kurde Zozane Serhat merasîm de qisey kerd û vat: ''Ê şehîdî seba welatêkê azadî kewtî rayîr û canê xo feda kerdî.''

Babîyê Navdarî Îbrahîm Ozsularî zî wina qisey kerd: ''Ma pê ey sereberz ê. Nê domanî seba rûmet û azadîya ma canê xo feda kerdî. Sereyê ma berz o.''