Îtîfaqê Vera NATOyî vera qanûnê neweyî yê bi nameyê 'hukmê cezaya taybete yê seba endamîya rêxistina terorî' ke seba heq û azadîye gef o, Stockholmê Swêdî de rayraşîyayîşêk kerd. 

Rayraşîyayîş de Meclîsê Cinîyan ê Kurdan ê Amara û Merkezê Komelê Demokratîkî yê Kurdan zî qisey kerd.

Qiseykerdişan de ame vîrvistene ke kurdan vera DAÎŞî şer kerdo û nêbeno ke sîyasetmedarê Swêdî  qanûno ke dişmenîya kurdan keno tesdîq bikero. 

Partîya Çepe zî îfade kerd ke Swêd seba menfaetanê xo kurdan keno qurbanê Erdoganî. Partîya Çepe da zanayene ke ê do tim hetê kurdan de bibê.

Rayraşîyayîş de vera Erdoganî sloganî ameyî vatene û pankarta 'Faşîstan de pêkewtişî rê ney' ameye akerdene. Reyna alê PKKyî, fotografê Rayberê Şarê Kurdî Abdullah Ocalanî ameyî akerdene. Rayraşîyayîş dima vurîya mîtîngî.

Hunermendê kurdî Serhedoyî zî mîtîng de qisey kerd û vat: ''PKK teyna rêxistinêke nîyo îdeolojîya bi mîlyonan merdiman o. PKK şar o û şar tîya de yo''

Qiseykerdişanê mîtîngî de wina ame vatene: ''Ma sey swêdijan vanê ke ma rotiş û qurbankerdişê kurdan tesdîq nêkenê. Eke şima demokrat ê krîmînalîzekerdişê kurdan vindarnê.

Mîtîng bi slogananê sey “Na ji NATO’yê re!”, “Na ji yasaya terorê re!”, “Em azadiya derbirîn û birêxistinbûyînê biparêzın!” û “Pîştevanî, ne teror e!” qedîya.