Komîteya Hemleya 'Rayber Apoyî rê Azadîye' ya Brîtanya 10ê teşrîna peyêne de paytext London de rayraşîyayîşêkê pîlî do bikera. 

London, Edmonton û Liverpool de seba rayraşîyayîşê 'Rayber Apoyî rê Azadîye' yê 10ê teşrîna peyêne keye û dikanî yenê zîyaretkerdene, standî ronîyenê, radyoyan ra veng dîyeno, afîş û vilawekî yenê vilakerdene û şar yeno dawetkerdene.

Çarçewa xebatan de London de serkêşîya Têgêrayîşê Ciwananê Şorişgêran (TCŞ) û Komîsyonê Sosyalî de keyeyî ameyî zîyaretkerdene û zîyaretan de qalê girîngîya hemle ame kerdene. Ancî derheqê tecrîdî de vilawekî, broşurî û afîşî ameyî vilakerdene û dardekerdene.

London de radyoyan ra, sîteyanê têkilîyan û medyaya dîjîtale ra zî venga pêro kesan dîyena ke wa tewrê rayraşîyayîşî bibê.

Meclîsê Şarê Kurdî zî bi telefon û zîyaretkerdişî seba beşdarîya rayraşîyayîşî veng dano.

Merkezê Komelê Kurdan ê Liverpoolî zî standan akeno û şarî rê qalê armancê Hemleya Azadîye keno. Liverpool de seba resnayîşê şarî otobusî û wesayîtê taybetî ameyî peydakerdene.

Rayraşîyayîşî ra dima London de verê Îstasyonê Picadilly Line de mîtîngêk zî do bêro kerdene.

Hemserekê Meclîsê Şarê Kurdî yê Brîtanya Seyît Suruçî ard ziwan ke ê bi ruhê seferberî amadekarîya çalakîye kenê û vat: ''Ma seba kiriştişê şarê xo otobusî kîra kerdî, komîsyonî nayî ro. Xebatê ma dewam kenê. Ma venga pêro kurdîstanijan danê ke tewrê rayraşîyayîşê ma bibê. Rayber Apo lîder û îradeyê şarê kurdî yo. Seba çareserîya meseleya kurdan Rayber Apo muxatabo verên o. Ma nê mesajî çalakîya xo de do biresnê pêro dinya.''

Endamê TCŞyî Mazlûm Çewlîgî vat: ''Seba ke tecrîd bişikîyo û Rayber Apo azad bibo ma hemle ser bivisnê.''

Endamê TCŞyî Hamza Amedî vat: ''Ma venga şarê xo danê ke seba azadîya Rayber Apoyî biqîro.''