Serekê Pêroyî yê Komelê Îslamîya Kurdîstanî (CÎK) Hafiz Ahmet Turhalliyî derheqê weçînayîşanê 14ê gulane de ANFyî rê qisey kerd.

Turhalliyî vist vîrî ke AKP 20 serrî yo pê şuxilnayîşê dînî îqtîdar de yo û vat: ''AKP bazirganîya dînî keno. Homa Quran-i Kerîm de vano 'Ayetanê Homayî meroşê.'  Coka ganî misilmanî hayîdar bê. AKP tim bazirganîya dînî keno û plan keno ke nê weçînayîşan de zî bi nê hawayî têbigêro. Nê weçînayîşî girîng ê coka ganî pêro misilmanî hayîdar bibê. Ê kesê ke dînî kenê hacetê weçînayîşî û polîtîka kenê, wa şarê ma pê nînan mexapîyo.''

Turhalliyî bale ante ser ke AKPyî îtîfaqo ke partîyanê bînan de kerdo, sey 'îtîfaqê Îslamî' şarî rê lanse kerdo. Turhalliyî vat: ''Îtîfaqê Îslamî ganî vera zulmî, neheqî û xirabîye bo. La îtîfaqê AKPyî terefgîrê kiştiş, nîjadperestî û dizdî yo. Nîjadperestîye hetê Pêxemberî ra ameya qedexekerdene la AKPyî partîya nîjadpereste MHPyî de îtîfaq kerdo. Yew eleqeyê AKPyî bi misilmanîye çin o. Wa kurdî û misilmanî hînî pê nînan mexapîyê.''

Turhalliyî eşkera kerd ke Dîyanet û dezgehê bînî yê îqtîdarî bingeyê Tirk-Îslamî de nîjadperestîye kenê û vat: ''Nînan 20 serran de sîstemê talanî na ro û Îslam zî nê sîstemî rê kerd hacet. Îslam de xesp û talan guneyê pîlî yê. Wa her kes nê çîyan ser o vindero û goreyê nê kerdişan tercîhê xo bikero.''