CDU vera Erdoganî qisey kerd

Sereka partîya serdest a Almanya CDU Annegret Kramp-Karrenbauere qerarê betalkerdişê weçînayîşê Stenbolî rexne kerd û peyam da ke weçînayîşê 23'yê Hezîrane de ê do paştdayîş bidê muxalefetî.

Partîya Serekwezîra Almanya Yewîya Demokratanê Xirîstîyanan (CUD) partîyanê muxalîfîyan ê welatî ra rol dizna û dest bi dişmenîya AKP'yî ya Serekîya Tayyîp Erdoganî kerd. Sereka Pêroyî ya CDU Annegret Kramp-Karrenbauere hemkarîya Hukmatê Almanî yo fedaralî ya eskerîye, sîyasî, ekonomî ya bi rejîmê Erdoganî xo vîr a kerd û reya verêne bi hawayêkê zelal vera AKP’yî qisey kerd.

Sereka CDU Duîsburg de mîtîngê seba weçînayîşê Parlamentoyê Ewropa de qisey kerd û vat, “Tewrbîyayîşê weçînayîşê PE hetê bînî ra yeno manaya paştdayîşî muxalefetê Tirkîya. Hemwelatijê Estenbolî bi weçînayîşê şaredarê xo do cehd bikê ke sîyasetê Erdoganî rê bivajê, ney.”

Dimayo ke Erdogan bin kewt, weçînayîş betal kerd

Sereka CDU derheqê têkilîya mabênê weçînayîşê PE yê ke 26'ê Gulane de bibê û yê weçînayîşê Stenbolî yo ke 23'yê Hezîrane de do bibo de qisey kerd û vat, ''26'ê Gulan de tewrbîyayîş zêde bo, nê yeno manaya paştdayîşê muxalefetê Tirkîya yo ke zext û zordarîye serê înan de esta û azadîya înan ameya sînorkerdene.” Kramp Karrenbauere bi nêvatişan bi nê peyamî rastarast eşkera kerd ke weçînayîşê Stenbolî de ê do paştdayîş bidê partîyanê muxalefetî.

Dewam qiseykerdişîê xo de vat, “Seba ke netîceyê weçînayîşê Stenbolî goreyê zerrîya Erdoganî nêbî, demokrasî hîç ame hesibnayene û qerarê betalkerdişê weçînayîşî ame dayene.”