Cindî Tuncelo ke wextêkê dergî ra nata Endamê Parlamentoyê Bremenî yo, hetkarîya serekê koma meclîsî ya partîya xo keno. Tuncelo ke qezaya Mîdyadî ya Mêrdînî ra yo, sekreterîya heyetê îdareyî ya Parlamentoyê Bremenî zî keno.

Tuncelo ke 38 serrî yo Almanya de yo, bi taybetî seba ke Qirkerdişê Êzidîyan ê 3yê Tebaxa 2014î sey jenosîdî bêro qebulkerdene xeylêk xebatî kerdî.

Tuncelî pare kerd ke reya verêne Almanya de ey Qirkerdişê Êzidîyan parlamento de ardo ziwan û vat: ''Emser Berlin de Qirkerdişê Êzidîyan sey jenosîdî ame qebulkerdene. Na babete de partîya ma Die Linke bîye hetkar. La destekê şarê ma ra nêbîyêne û ez parlamento de nêbîyêne no qirkerdiş hende nêameyêne zanayene.''

14ê gulane de weçînayîşê Parlamentoyê Eyaletê Bremenî est ê. Cindî Tuncel lîsteya Die Linke ra rêzê 12. de namzedê parlamenterîye yo. Tuncelî venga pêro kurdîstanijanê Bremenî da ke wa paştî bidê ci.

Tuncelî vat: ''Weçînayîşê Parlamentoyê Bremenî û weçînayîşê Tirkîya heman roje de yê. Bremen de merdimê ke 15 serre ra pîlêr ê, eşkenê raye bidê. Ez wazena ke wa şarê ma raya xo bido mi Cindî Tuncel. Raya şima do biba vengê şima.''