Halîm Denero 16 serrî 30’ê Hezîrane 1994 de wexto ke afîşê ERNK’î darde kerdêne hetê karmendê polîsan Klaûs T. ra amebi qetilkerdene. Dewleta Almanî ya Rayberîya Eyaletê Saksonya ya Cêrî, bi taybetî bi polîtîkayanê wişkan ê vera Kurdan yena naskerdene, nê 25 serrî yê seba ke nameyê Halîm Denerî bida vîrrakerdene çi destê ci ra yeno kena. Kurdistanijî û dostê înan ê ke bajar de ciwîyenê bi serran o seba ke nameyê Halîm Denerî bidê ciwîyane têkoşîn kenê.

Dener serrgêra qetilkerdişê ci de wareyê Steîntorî de do bi çalakîya vîrardişî ya serrgêra 25’ine bêro vîrardene. Roja 30’ê Hezîrane (Yewşeme-Siba) saete 21:00 de Kurdistanijî û dostê înan do vera hişmendîya qedexekerdişî ya dewleta Almanî, ciwanê Kurdî bi çalakiyan yad bikerê.

Çalakîya bîne 6’ê Temmuze saete 14:00 de bajarê Hannover de, Ernst-August-Platzî de do bêra viraştene.  Çalakîye de do Dener bêro vîrardene û sîyasetê krîmînalîzekerdişê dewleta Almanî yê vera şarê Kurdî bêro şermezarkerdene. Kurdistanijî û dostê înan ê bajarê Hannoverî û bajaranê bînan ê Almanya tewrê çalakîye bibê.

Emser çalakîyê vîrardişî yê Denerî do bi nameyê “Îşkence Halîm Denerî rê ame kerdene, rema, ame qedexekerdene û Hannover de ame pirodayene” bêrê  viraştene.