Xeylêk şaristananê Ewropa de 4ê Nîsane rojbîyayîşê Rayberê Şarê Kurdî Abdullah Ocalanî vizêr zî bi coşî ame fîrazkerdene.

Kantonê Bernî yê Swîsre de bi beşdarîya endamanê Komeleya Kulturê Kurdan şayîyêke ameye kerdene. Şayîye pê govendan qedîyaye.

Şaristanê Solothurnî yê Swîsre de hetê Komunê Cinîyan ê Pinare ra Merkezê Komelê Kurdan ê Demokratîkî de şayîyêke ameye kerdene. Qiseykerdişan de tecrîdê Îmraliyî ame şermezarkerdene û ame vatene ke azadîya Ocalanî azadîya cinî û ciwanan a.

Şaristananê Bordeauxî yê Fransa de bi şayîyêke 4ê Nîsane ame fîrazkerdene. Şayîye de sînevîzyonêk ame mojnayene, govende ameye girewtene û sloganî ameyî vatene. 

Şaristanê Fribourgî yê Swîsre de şayîye de ame vatene ke ganî azadîya Abdullah Ocalanî her cayê dinya de bêra waştene û seba ney têkoşîn bêro berzkerdene. Şayîye de derheqê paradîgmaya Rayberê Şarê Kurdî de sînevîzyonêk ame mojnayene.