Çalakîya protestoyî ya Almanya bi rojan a dewam kena. Cugehpawitoxê Ende Gelaende (Dingeho peyên) kewtî mîyanê merkezê madenî yê Garzweîllerî.

Ame zanayene ke amancê na çalakîye vernîgirewtişê karê madenî yo ke hetê şîrketê girdî yê enerjî yê Alamanan NRW’î ra yeno bikarardene.

Aktîvîstê Ende Gelaende çend rojî verê cû santralê tewr girdî yê komiran ê Almanan Fabrîqeya Neurathî îşxal kerdîbî û karê ci daybî hêdîkerdene.

Nêzdîyê panc hezar çalakgerî seba trênanê ke sotemenî ancenê ocaxanê komiran bidê vindarnayene, holikê qijî serê xeta trêne de viraştî.

Hetê bînî ra dewa Keyenbergî ya ke rîyê projeyê girdkerdişê ocaxa madenî  ra binê tehdîtê rijîyayîşî de ya, têgêrayîşê "Friday for Future"yî nêzdîyê heşt hezar wendekarî ardî têhet.

Vervatoxa Ende Gelaende Kathrîn Hennebergere eşkerayîye daye û da zanayene, çalakîya înan ‘Seba hêvîkerdişî sedemêk’ o û vat, “Rixmê nêserkewtişê girdî yê sîyasetmedaran ê hemverê krîzê îklîmî, bi hezaran kesî ewro seba edaletê îklîmî bi hawayêkê akerdeyî sînyalêk şawenê.”

Hennebergere vat, “Wazena çalakîye ba, wazena grevêk wendegehî yan zî blokaj bo, no têgêrayîş qerardar o ke peynîya serdemê sotemenîya fosîlî bîyaro.”

Bi vengdayîşê têgêrayîşê "Frîday for Future" roja Îneyî 16 welatan ra nêzdîyê 40 hezar kesî bajarê Aachenî yê Almanya de seba qedênayîşê bikarardişê komirî û girewtişê tedbîranê şenberan ê derheqê îklîmî ameyî têhet û rayraşîyayîşêk viraştîbî.