Şaristanê Landgrafî yê Hollanda de bi şîarê azadîya Rayberê Şarê Kurdî Abdulllah Ocalanî, Festîvala Kulturê Kurdan a Mîyanneteweyîye ya 30. ameye fîrazkerdene. Bi hezaran kesî Almanya, Fransa, Belçîka, Swîsre, Avusturya, Îtalya û Îngilîstanî ra tewrê festîvale bîyî.
Festîvale bi deqayêkê rêzgirewtişî dest pêkerd. Dima nameyê Komîteya Amadekarîye ser o Hemserekanê KCDK-E Yuksel Koç û Fatoşe Goksungur qisey kerd û înan qala tecrîdê vera Rayberê Şarê Kurdî Abdullah Ocalanî, hêrişanê îşxalî yê dewleta tirke û xoverdayîşê gerîlayan kerde.
Dîwanê dengbêjîye serkêşîya Hozan Şemdîn û Hozan Marûfî de ame akerdene.
Dima Hemserekê KNKyî Ahmet Karamusî qisey kerd û îfade kerd ke ganî kurdî hîna zaf wayîrê gerîlayan vejîyê.
Rayraşîyayîşo Derg ê ciwananê kurdan û enternasyonalîstan warê festîvale de qedîya, ciwanî bi sloganê 'Ciwanî fedayîyê Serek Apoyî yê' kewtî warî û nameyê ciwanan ser o Çekdar Serhatî qiseykerd. Serhatî ard ziwan ke ciwanî do pê xoverdayîşê xo tecrîdî bişiknê.
Sereka Meclîsê Sûrîyeya Demokratîke Îlhame Ehmed bi sloganê 'Biciwîyo xoverdayîşê Rojawanî' vejîyaye sehne ser û pare kerd ke Şorişê Rojawanî şorişê kultur û ziwanî yo.
Festîvale de deyîrê Koma Rêya Heq, Koma Rojava û Koma MA ameyî goşdaritene û mesajê KJKyî ameyî wendene.
Nameyê Koma Paştdayîşê bi Kurdan a Afrîkaya Başûrî ser o Fazela Mahomad û nameyê Komîsyonê Hemwelatîyanê Tirkîya yê Yewîya Ewropa (EUTCC) ser o Kariane Westrheim qisey kerd û înan waşt ke Abdullah Ocalan cade azad bibo.
Fazela Mahomad vat: ''Dewleta tirke vera kurdan polîtîkayanê qirkerdişî rê dewam kena. Nika wext wextê haştîye û azadîya Abdullah Ocalanî, paştdayîşê mîyanneteweyî û prosesê çareserî yo.''
Kariane Westrheim vat: ''Ma her çî ra ver seba azadîya Abdullah Ocalanî xebitîyenê, têkoşîn kenê û na kampanya virazenê. Ma na bêvengîye de vengê ey eşnawenê. Tecrîdo vera Ocalanî zulm o. Ma venga Konseya Ewropa danê ke qet nêbo Tirkîya ra hesabê binpaykerdişan bipersa û ma venga Amerîka, NY û NATOyî danê ke wa paştî nêdê Erdoganî, verê temsîlkaranê kurdan abikerê.''
Qiseykerdişan ra dima mesajê bi vîdeoyan ê Hemserekanê KCKyî Besê Xozat û Cemîl Bayik, Endamê Komîteya Rayberdişî ya PKKyî û Fermandarê Qerargehê Merkezê Pawitişê Şarî Murat Karayilanî ameyî wendene. Girseyî pê tîlîlî û sloganan mesajî pêşwazî kerdî.
Festîvala Kulturê Kurdan a Mîyanneteweyîye ya 30. pê deyîranê Koma Şengalî qedîyaye.