Huqûqnasa heqanê merdiman Margarete Owena ke ANFyî rê qisey kerd ard ziwan ke goreyê huqûqê mîyannteweyîyî ganî Rayberê Şarê Kurdî Abdullah Ocalan bêro veradayene û PKK zî lîsteya ‘terorî’ ra bêro vetene.

Owenî ard ziwan ke tecrîdê sere Rayberê Şarê Kurdî Abdullah Ocalanî bêhuqûq o û sey îşkenceyî yeno kerdene û vat: ‘’Pêkerdişê Neteweyanê Yewbîyayeyan, Şertê Mandela, qerarê Mehkemeya Heqanê Merdiman ê Ewropa zî tede huqûqê mîyanneteweyîyî û normê merdimi yenê binpaykerdene. 18 mengî yo ke Ocalanî ra xebere nîna girewtene, ma nêzanê rewşa ci senîn a. Ocalan rayberê şarê kurdî yo, merdimanê hêzdaran ê tarîxê merdimîye ra yew o. Zîndan de zî nuseno, cehd keno ke meseleyan çareser bikero. Aktorê esasî yê çareserîya pêkewtişo ke dewam keno, yo. Seba ke dîyalogo ke 2015 de ame vindarnayene dewam bikero ganî Abdullah Ocalan bêro veradayene. Heme dezgehê heqanê merdiman nê vanê. Goreyê huqûqê raştî ganî Rayberê Şarê Kurdî Abdullah Ocalan bêro veradayene û PKK zî lîsteya ‘rêxistinanê terorî’ ra bêro vetene.’’

Owene bale ante  dewleta tirke  Hemramanê Pawitişî yê Medya de çekanê kîmyewîyan şuxulnena ser û veng da hukmatê îngilîzî ke wa çekan meroşo Tirkya. Owene vat: ‘’Şuxulnayîşê çekanê kîmyewîyan zî ci rê qîm nêkeno. Hêrişê Şingalî yo ke êzidî tede ciwîyene û Mexmurî yo ke tede multecîyî est ê kenê. Rixmê nê hêrişan bêvengîya mîyannteweyîye est a. Na tam yew dirîyîye ya. Tewirê hukmatê Îngîlîstanî zî wina yo. Rûsya û Çînî rê tewir yeno girewtene la sûcdarê şerî Erdogano ke çekanê kîmyewîyan şuxulneno rê bêveng yeno mendene, paştî dîyena ci. Dronê ke Tirkîya şuxulnena tay parçeyê ci yê Îngîlîstanî yê. Ez sey pawitoxê heqanê merdiman seba ke hukmatê mi paştî dano terorîzmê dewlete ez ey şermezar kena.’’

Owene ard ziwan Abdullah Ocalan têna semedê kurdan nê semedê azadîya heme şaranê herême de têkoşîn keno û vat: ‘’Sîstemê konfederalîzmê demokratîkî yo ke ewro Rojawan de yeno caardene û sere de cinîyî heme şar û îtîqatî xo tede azad îfade kenê, mîmarê ci Abdullah Ocalan o. No model têna semedê Sûrîye û Rojehlatê Mîyanênî nê semedê heme dinya yo. Ez do tim semedê kurdan azadîye û edalet biwazî. Ez hêvî kena ke demê nizdî de şirê Rojawanî.’’