Sekreterê Federasyonê Xebatkaranê Perwerdeyî yê Herêma Lombardia yê Îtalya Massimiliano De Conca ANFyî rê qalê tecrîdê vera Rayberê Şarê Kurdî Abdullah Ocalanî kerd.

De Concayî da zanayene ke tecrîdê Îmraliyî şexsê Ocalanî de vera pêro kurdan yeno caardene û vat: ''Hêzê serdestî fikranê Ocalanî ra tersenê coka verê tecrîdî de bêveng manenê. Komelê Ewropa zî NATO zî babeta tecrîdî de durist tênêgêrenê. Bêvengîya mîyanneteweyî ya vera tecrîdî eslê xo de skandalêk a. Ewropa bi temamî seba menfaetanê xo verê tecrîdî de bêveng a.''

De Concayî dîyar kerd ke fikrê Rayberê Şarê Kurdî seba pêro dinya cayê girîngî gênê û vat: ''Ocalan vera terorîzm û şerî cuya haştîye paweno la hêzê mîyanneteweyîyî ney nêwazenê. Fikrê konfederalîzmê demokratîkî yê Ocalanî seba şaran rayîrê çareserîye yo. Sîstem nê fikrî ra terseno.''

De Concayî bale ante Hemleya 'Abdullah Ocalanî rê azadîye, meseleya kurdan rê çareserîya sîyasîye' ser û vat: ''Azadîya Ocalanî seba averşîyayîş û demokrasîyî girîng a. Ocalan alternatîfê sîstemê nikayênî yo. Coka ganî o azad bibo.''