Seba şermerzarkerdişê peymana Hewlêr-Bexdadî ya seba Şingalî, vera hemkarîya PDK û dewleta tirke û bi armancê  şermezarkerdişê dardekerdişê ciwanan ê kurdan şaristanê Den Haagî yê Hollanda de çalakîya xeyme ya 3 rojan roja sêşemeyî dest pêkerde.

Roja verêne ya çalakîye de Hemserekê DEM-NEDî Huseyîn Yildizî eşkerayîye daye û hêrişê vera Têgêrayîşê Azadîye yê Kurdîstanî şermezar kerdî. Yildizî îfade kerd ke peymana Şingalî ser o nêna qebulkerdene û waşt ke xoserîya Şingalî wa şinasîye.

Yildizî PDK bi xurtî rexne kerd û vat: ''Ganî PDK dezgehanê kurdan reyde têbigêrê. Ganî têkilîya bi dişmenî war verdo.''

Roja verêne ya çalakîye bi slogan, marş û govendan qedîyaye.

Çalakîye do ewro û pancşeme heman ca de dewam bikera.