Cinî û ciwananê kurdan destsernayîşê şaredarîyanê HDPyî, hêrişê vera goran û şîdetê vera cinîyan şermezar kerdî.

Toronto

Şaristanê Toronto yê Kanada de rayberîya Komunê Cinîyan ê Sara Ozgur de destsernayîşê şaredarîyanê HDPyî û şîdetê vera cinîyan ameyî şermezarkerdene. Nameyê komunî ser o Elîfe Genç qisey kerd û vist vîrî ke wextê karantîna de Kanada de 9 cinîyî hetê camêrdan ra ameyî kiştene. Çalakîye de operasyonê qirkerdişê sîyasîyî ameyî şermezarkerdene.

Stockholm

Cinîyanê kurdan seba şermezarkerdişê  hêrişanê dewleta tirke yê vera kurdan her roja şemeyî şaristananê  Stockholm, Orebro, Goteborg û Uppsala de vejîyenî meydanan. Çalakîyanê na roja şemeyî de alayê Têgêrayîşê Cinîyan ê Kurdan, PKK, KCKyî ameyî berzkerdene û pê pankartan destsernayîşê şaredarîyanê HDPyî û tepiştişê sîyasetmedaran ê kurdan ameyî şermezarkerdene.

Strasbourg

Destsernayîşê şaredarîyanê HDPyî û hêrişê vera goran şaristanê Strasbourgî yê Fransa de hetê ciwananê kurdan ra ameyî şermezarkerdene. Ciwanan alaya PKKyî Sersefîrîya Tirkîya ya Stockholmî de akerde û îfade kerd ke ê do çalakîyanê xo bizêdînê.

Stuttgart

Şaristanê Stuttgartî yê Almanya de zî rayberîya aktîvîstanê Têgêrayîşê Ciwanan ê Şorişgêran û Cinîyan ê Ciwanan ê Azadan de çalakîyêke ameye kerdene. Çalakîye de hêrişê dewleta tirke yê vera erjanê kurdan ameyî şermezarkerdene. Çalakîye de posterê Rayberê Şarê Kurdî Abdullah Ocalanî, alayê TCŞ, JCA û MLKPyî ameyî berzkerdene. Çalakîye de ciwanan venga şarê kurdî da ke wayîrê erjanê xo bivejîyê.