27ê teşrîna peyêne ya 2019î de şaristanê Heilbronnî yê Almanya de polîsan eşt Merkezê Komelê Demokratîkî yê Kurdan (NCDK) û keyeyanê îdarekeranê ci ser. Muxabîrê Yeni Ozgur Politika û Hemserekê Federasyonê Şaran ê Kurdîstanî (FED-GEL) Saît Ozturk zî tede vera 5 îdarekaran muxalefetê Qanûnê Komeleyan ra dewa ameye akerdene.

Sereştişan de dest nîya fotograf, belge, dîmen û telefonan ser û beşdarîya bi çalakîyanê seba Rojawanî, berzkerdişê alayanê PKK û KCKyî sey 'sûcî' kewtî îdîaname.

Roniştişê dewa de 28ê teşrîna verêne de Komîserê Îstîxbaratê Heilbronnî îfade da û bi vateyê 'Îdarekarêkê PKKyî yo ke hetê dorme ra yeno heskerdene û her kes goş nano qiseyê ci ser' Saît Ozturk hedef mojna.

Avûkatan nê îfadeyî rê îtîraz kerd. Saît Ozturkî zî mehkeme de ard ziwan ke Almanya waştişê Tirkîya ser o kurdan û têkoşînê înan krîmînalîze keno. Ozturkî vat: ''Xîret ame kerdene ke xeberê ke mi kerdî sey sûcî bêrê mojnayene. Polîsan dest na arşîva min a fotografan ser.''

Heyetê mehkeme peynî de 5 kesan rê cezaya pereyî ya 7 hezar û 400 euro daye û bi vateyê 'Ma nasnameyê şima yê kurdayetîye ra nê şuxilnayîşê sembol û alayanê qedexekerdeyan ra na ceza danê' kerd ke ceza bikero meşrû.

Ozturkî vera bire nêrazîbîyayîşê xo mojna û vat: ''Qedexekerdişê sembol û alayanê kurdan qanûnî nîyo. Almanya pê nê qedexeyan bena hemkara polîtîkayanê Erdoganî. Ma do teslîmê krîmînalîzasyonî nêbê, têkoşînî rê dewam bikerê. Ma do na bire rê îtîraz zî bikerê.''

Endamê Meclîsê Şaredarîye yê Heilbronnî yê Partîya Çepe Konrad Wannero ke mehkeme teqîb kerdêne nêzdîbîyayîşê Almanya yê bi kurdan rexne kerd û vat: ''Têkoşînê kurdan meşrû yo. Bi bahaneya 'qedexeyê vera PKKyî' ceza dîyena. Ma do seba wedaritişê qedexeyê vera PKKyî xebatanê xo rê dewam bikerê. PKK Kurdîstanî û şarê kurdî paweno.''

Temsîlkarê Rote Hilfe yê Heilbronnî Wolfgang F. zî vat: ''Bi bahaneyan erzîyeno komele û keyeyanê kurdan ser. Ganî ma vera qedexeyê serê PKKyî wedarnê ke îzolasyonê kurdan biqedo.''