Meclîsê Şarê Kurdan ê Londra de Londra de Huseyîn Boyraz (Rûbar Dîcle), Nîhat Ayaz (Xelîl) û Ahmet Kiliç (Murat Dep) ê ke Herêmanê Pawitişî yê Medya de hêrişê hewayî yê 6ê çeleyê 2017î de şehîd bibî bi merasîmêk ameyî yadkerdene.

Merasîmî Kurdish Community Center ê Haringe de ame kerdene û keyeyê Boyrazî, Kiliçî û keyeyê şehîdan tewrê merasîmî bîyî. Temsîlkarê rêxistinanê demokratîkan û bi seyan kesî zî tewrê merasîmî bîyî. Merasîmî seba vîrameyîşê şehîdan ê têkoşînê azadîye bi deqayêkê rêzgirewtişî dest pêkerd. Mojnayîşê sînevîzyonî ra dima qala Rûbar Dîcle û embazanê ci ameye kerdene.

Birayê Huseyîn Boyrazî û embazê ci yê têkoşînî Alî Poyrazî merasîm de qisey kerd û vat ke prosesê têkoşînî yê her hîrê şorişgêran seserrêk o.Poyrazî wina dewam kerd: "Şehîdî seba ma xeta sûre yê. Çunke nê erjê ke ewro ameyî awankerdene pêro bi keda şehîdan ameyî destvistene. Ma kuçeyan de ameyî qetilkerdene. Zîndanan de îşkence bi ma ame kerdene. La ma qet çok nêda erdî ro. "

Merasîm de qiseykerdişê Endamê Komîteya Merkezî ya PKKyî Duran Kalkanî yê derheqê Rûbar Dîcle de û embazanê ci de ame seyrkerdene. Merasîm de bêmabên sloganê ''Şehîdî nêmirenî' ame berzkerdene. Dima Hozan Sewder vejîya sehne ser û merasîm bi goştarîkerdişê deyîran qedîya.