Dîwanê Edaletî qerarê PKKyî eşkera kerd

PKKyî ya seba ke lîsteya terorî ya mabenê serranê 2014 û 2020 ra bêro vetene, dewa akerdbî. Dîwanê Edaletî yê Yewîya Ewropa qerarê dewa eşkera kerd.

PKKyî vera “lîsteya rêxistinanê terorî” ya 2014-2020 ya Konseya  Yewîya Ewropa dewa akerdbî. Qerarê na dewa ame eşkerakerdene.

Dîwanê Edaletî yê Yewîya Ewropa  qerarêkê xo yê verênî de vatbi ganî PKK lîste ra vejîyo la rixmê nê Konseya Yewîya Ewropa her aktuelkerdişê lîste de pê eynî argumanan PKKyî newe ra gena lîste.

Qerarê neweyî  de çarçeweya lîsteya 2014î de astenkerdişê ke vera PKK û dezgeh û şexsan de amebî kerdene, ameyî betalkerdene, semedê lîsteyanê ke dima ra ameyî cewabo negatîf dîya PKKyî.

Mehkemeya Dîwanî qerar girewt ke her het mesrafê xo bido. Goreyê nê Komîsyonê Yewîya Ewropa, Komara Fransa û Hollanda do mesrafê xo bidê.

Goreyê zanayîşanê ke ameyî girewtene avûkatê PKKyî do demê kilmî de bêrê têhet û qerarî biercnê. Qerar eşkeno bêro temyîzkerdene. Qerarê mehkeme 260 madeyan ra yeno pê.

Dewleta almanî 26ê teşrîna peyêne ya 1993yî de PKK girewt lîsteya terorî. Dima  ra PKK 2002 de gerîya lîsteya terorî yê Yewîya Ewropa. Dîwanê Edaletî yê Yewîya Ewropa de derheqê PKKyî de 2014î ra nata xeylêk dewayî ameyî kerdene.  Dîwanî peynîya 2018 de bi qerarêkî lîste mabênê 2014-2017 betal kerdî.  Mehkeme qerar girewt ke wa PKK lîste ra vejîyo.  La Yewîya Ewropa no qerar temyîz kerd. Cade dima ra Îngîlîstanî 2018 de newe ra muracat kerd ke wa PKK lîste de bimano û PKK pê eynî argûmanan 9ê çeleyê 2018î newe ra gerîya lîste.  Hetê kurdan eynî serre vera lîste dewa akerde. Konseya Yewîya Ewropa nê dewayî pêro kerdî yew.
 Yeno pawitene ke do qerarê dewaya ke PKKyî vera lîsteyanê peyê 2020î akerdî, 14ê kanûnê de bêro akerdene.