Dusseldorf de bi des hezaran kesan hêrişê kîmyewîyî protesto kerdî
Hêrişê kîmyewî yê vera gerîlayan Dusseldorf de bi beşdarîya bi hezaran kesan ameyî protesto kerdene.
Şaristanê Dusseldorfî yê Almanya de rayraşîyayîşê vera hêrişanê kîmyewîyan di baskan ra hetê kurdîstanijan û dostanê înan ra dîya destpêkerdene. Rayraşîyayîşo ke hetê Partîyanê Kurdîstanîyan ê Ewropa û Yewîya Hêzê Demokratîkî ya Ewropa (ADGB) ra ame serûberkerdene, bi deqayêkê rêzgirewtişî di baskan ra dest pêkerd. Bi beşdarîya bi des hezaran kesan rayraşîyayîş de bêvengîya OPCW, Neteweyanê Yewbîyayeyan (NY), NATO û dewletan yena protestokerdene. Rayraşîyayîş DGB Haus de (Zap) û Parka Rheinwiesenî (Avaşîn) de dest pêkerd. Girseyê rayraşîyayîşî seba ke bale bianco hêrişanê kîmyewîyan ser kincê sipîyî dayî xo rê, fotografê 17 gerîlayanê şehîdan akerdî û sloganê sey 'Zap, Avaşîn, Metîna', ’, ‘Bijî berxwedana gerîla’, ‘Jin jiyan azadî’ û ‘Bijî Serok Apo’ vatî.
Rayraşîyayîşê di baskan Parka Rheinî de qedîyayî. Tîya de Hemserekanê KON-MEDî Zubeyde Zumrut û Engîn Severî girse selam kerd û qisey kerd. Dima Hozan Dîyar vejîya sehne ser.
Wendişê mesajan û qiseykerdişan ra dima eşkerayîya hempare ameye wendene.
Eşkerayîye de ame vîrvistene ke dewleta tirke serra 100. ya Lozanî de wazena reyna peymane dibare bikera coka bi her hawayî hêrişê gerîlayan kena û wazena kurdan bi temamî qir bikera. Eşkerayîye de ame parekerdene ke vera nê hêrişan bêvengmendişî yeno manaya tesdîqî û sere de OPCW venga rêxistin û dezgehanê mîyanneteweyîyan dîya ke wa heyetê xoserî bierşawîyê herême.
Eşkerayîye de bale ameye antene ser ke Dêrsim de vera kurdan û Tirkîya de vera rûmanê pontusî zî çekê kîmyewîyî şuxilîyabî û bi des hezaran merdimî pê gaz û çekanê kîmyewîyan ameybî qetilkerdene.
Eşkerayîye de wina veng dîya: ''Sere de Rêxistina Vergirewtişê Çekanê Kîmyewîyan (OPCW) ganî pêro dezgehî cade mesuldarîyanê xo bikerê, herême de cigêrayîşan bikerê, sûcdaranê hêrişanê kîmyewîyan rê ambargo bikerê. Nêbo nê rêxistin û dezgehî zî do bibê hemkarê sûcî.''
Eşkerayîye ra dima Akademîsyenanê Haştîye ra Prof. Dr. Neşe Ozgen qisey kerd û tepişîyayîşê Şebneme Korur Fîncanci rexne kerd. Ozgene waşt ke ganî derheqê hêrişanê kîmyewîyan de vera dewleta tirke tehqîqat bêro kerdene.
