Dewleta tirke tebaxa 2019î ra nata tay keyeyan verê bînaya HDPyî ya Amedî de ronişnena. Dewleta tirke keyeyanê gerîlayan rê teda û zorbazîye kena ke verê HDPyî de ronişê, ajanîye bikerê. Keyeyê ke ney qebul nêkenê zî raştê gefanê dewlete yenê. Nê keyeyan ra yew zî keyeyê Mehmet Emîn Elmayî yo ke dewa Marîne ya Nisêbînî ra yo. Keye tedaya dewlete ra neçare mend ke koçê Îstanbulî bikero. Seba ke domanê înan gerîla yê, keye bi serran o binê gef û şantajanê dewlete de yo.

Elmayî da zanayene ke rojêke ci rê yew telefon ameyo, telefon de kesêkî xo sey 'wezîfedarê Cendirmeyanê Mêrdînî' dayo şinasnayene û nê kesî tira waşt ke verê bînaya HDPyî de ronişo. Elmayî vat: ''Nê kesî mi rê vat ke ê do mesrafê ma bidê, ma rê cayê mendişî bidê. Mi ci rê vat 'HDPyî domanê mi nêşawito ke ez înan ra biwaza.' Nê kesî narey vat 'Şima terorîst ê. Ez pê rindî to dir qisey kena la ti fam nêkenî. Sey esteyanê waya to ê Orhanî zî nêzdî de ma bidê to. Terorîsto pîs.' Dima çend reyî na xete mi rê telefon kerd û mi rê nêngî çînayî. Cendermeyê Şirnexî de 4 reyî pê telefonî gêrayî mi.

Ez îdarekarêkê HDPyî yê Zeytînburnuyî ya zî. Rojêke rayîr de 3 kesan ez vindarnaya, înan nasnameyê mi girewt, ez erdî ra kaş kerde. Înan ez dekerda wesayîtê xo. Înan mi ra waşt ke ajanîya înan bikera la mi qebul nêkerd. Înan tifing na mi sereyî.Dima çend rojî mi no wesayît verê keyeyê xo de dî. Mi bire daye ke welatî biterikna. Hewteyêk de ez û keyeyê mi ma welatîr a vejîyayî, bîyî multecî.''

Elmayî pare kerd ke tay kesê ke verê HDPyî ronişenê domanê înan gerîla nîyê û vat: ''La nê keyeyan ra domanê tay keyeyan gerîla yê. Nê keyeyî kewtê dafika dewlete.  Nê gerîlayan çend reyî venga keyeyanê xo da û vat 'mebê hacetê şerê taybetî yê dewlete.' Ganî ma destûr nêdê ke îradeyê ma bêrı şiknayene. Binê ê xeymanê şerm û îxanetî de romenişê.''