Grevê vêşanîye yê bêdemî yê endamê AvEG-Konî Ozkan Ozdemîrî yo ke 1’ê Nîsane de dest pêkerdibi bi tewrbîyayîşanê neweyan pîl beno. Vervatoxa Young Struggle Bîlen Ceyrane û sereka BEKSAM’î ya Swîsre Gulten Yavûze seba mengêk dest bi grevê vêşanîye kerd.

Bi nê amacî lokale ACTIT’î de eşkerayîye amî dayene. Hemsereka AvEG-Konî Bîrsel Ocake eşkerayîye wende û destpêk de Denîz Gezmîş, Huseyîn Înan, Yûsûf Aslan û Huseyîn Kayaci bi vîr ardî.

‘Qasê Hetê Xo yê Sîyasîyî Gureyêkê Merdimîye yo zî’

Ocake vat “No xoverdayîşo bianor seba qedînayîşê tecrîdkerdişê Birêz Ocalanî, qedîyayîşê tacîz, tecrîd û binpaykerdişê heqanê merdiman ê zîndanan, seba peynîciardişê zextanê serê muxalefetê cimatkîyî wezîfeyêko merdimîye yo. Ganî ma veng bidê vengê xoverdayoxanê ke çar hetanê Ewropa de beno berz û seba qebûlbîyayîşê waştişanê xoverdayoxan rayîr akerê.”

‘Ganî Ciwanî Mucadeleyî Pîl Kerê’

Bîlen Ceyrane zî bi ziwanê Franskî qisey kerd û vat ke ganî ciwanî mucadeleyê hemverê tecrîdî û faşîzmî xurt bikerê.

Sereka BEKSAM’î û endama SKB’yî Gulten Yavûze zî vat, “Mucadeleyê hemverê tecrîdî gureyêk o. Ez; sey mayêk û cinîyêka sosyaliste qasê mengêk kewena grevê vêşanîye.”

‘Xoverdayîşê Ma do Dewam Bikero’

Xoverdayoxê SAG’î Ozkan Ozdemîrî zî vat, “Îqtîdaro faşîst wazeno ke umîdî bin bifîno. Labelê sey roja ewilêne nika ra tepîya zî do xoverdayîş bi qerardarîye dewam bikero.”

Endamanê CDK-F’yî zî tewrê eşkerayîya çapemenîye bîyî û paştî daye.

Grevê vêşanîye do lokalê ACTIT’î yê Parîsî de dewam bikero.