Ewropa de xeylêk şaristanan de şehîdê menga teşrîna verêne yê ke serranê cîyayan ke bîyî şehîd, bi merasîman ameyî yadkerdene.

Hamburg: Şaristanê Hamburgî yê Almanya de semedê yadkerdişê şehîdan hetê Meclîsê Cinîyan ê Rojbîne ra merasîmek ame organîzekerdene. Têgêrayîşê cinîyan ra Ruha Dersima ke aktîvîte de qisey kerd vat: ''Şahadetê zaf ganê ma bidejnê zî hende zî wezîfe û berpirsîyarîya ma anê vîrê ma.''

Frankfurt: Merasîmê yadkerdişî bi deqayêkê rêzgirewtişî dest pêkerd. Merasîm de apê Herdem Rihayî (Osman Kaya) îfade kerd ke ê pê şehadetê birazîyê xo sereberz ê. Birayê Şehîd Fuatî Misteya Sultanîyî zî pare kerd keyeyê înan de 7 şehîdî estê û 3 birayê ey zî ameyî dardekerdene.

Kiel: Merasîm Komeleya Kurdan a Kielî de ame kerdene û Yewîya Cinîyan ê Sosyalîstan, Înîsîyatîfê Keyeyanê Şehîdan ê Rojawanî, AGIG û keyeyê şehîd Andok Cotkarî zî tede xeylêk kesî tewrê merasîmî bîyî. Qiseykerdişan de ame parekerdene ke xeyalê şehîdan teqez do bêrê caardene.

Den Haag: Şaristanê Den Haagî yê Hollanda de rayberîya Meclîsê Cinîyan ê Ronahî de Merkezê Komelê Demokratîkî yê Kurdan de şehîdî ameyî yadkerdene. Fevzî Akbulut merasîm de bale ante girîngîya rêxistinbîyayîşî ser û venga ciwanan da. Aktîvîsta TJK-E Zeynepe Zelal zî ard ziwan ke şehîde Bêrîtane sembola artêşbîyayîşê cinîyan a.

Liege-Anvers: Şaristananê Liege û Anversî yê Belçîka de zî şexsê Bêrîtane de pêro şehîdê menga teşrîna verêne ameyî yadkerdene. Merasîm de Hemsereka Nav-BELî Duduye Alabay û nameyê keyeyanê şehîdan ser o zî Sultane Ograş qisey kerd û înan pare kerd ke ê do wayîrê mîrasê şehîdan vejîyê.

Stockholm: Stockhom de merasîmê yadkerdişî bi mojnayîşê sînevîzyonî dest pêkerd. Merasîm de nameyê PJAKî ser o Emîr Babekrî qisey kerd û da zanayene ke ê do teqîbkerdoxê şehîdan bibê û bi azadîya Rayberê Şarê Kurdî Abdullah Ocalanî têkoşîn tacîdar bikerê. Dima Endamê Konseya Rayberdişî ya KCKyî Zebeyr Aydarî pêro şehîdî yad kerdî û seba tewrbîyayîşê Hemleya 'Wext Wextê Azadîye yo' venga her kesî da.

Evry: Merasîmê yadkerdişê Evryî de zî şexsê şehîde Bêrîtane de pêro şehîdê menga teşrîna verêne ameyî yadkerdene. Aktîvîste Leyla Şoreşger merasîm de qisey kerd û eşkera kerd ke şehîdanê têkoşînê azadîye neteweyêk awan kerd.

Drancy: Merasîmê yadkerdişî yê Drancyî yê Parisî de nameyê TJK-E ser o Zozane Serhed qisey kerd û vat: ''Ma do wayîrê mîrasê şehîdan vejîyê û têkoşînê înan ser bivisnê.''