Kopenhag û Stockholm de şehîdê 9ê gulane ameyî yadkerdene. Şaristanê Luzernî yê Swîsre de zî seba Sarya Diyar (Bîşenge Hezer) û embazanê ci yê ke xoverdayîşê Mamreşoyî de şehîd bîyî, aktîvîteya yadkerdişî ameye kerdene.

Şaristanê Luzernî yê Swîsre de Sarya Diyar (Bîşenge Hezer) a ke Girê Şehîd Munzurî de şerê vera artêşa tirke ya îşxalkere de pa 6 embazanê xo şehîd bîye Merkezê Komelê Demokratîkî yê Kurdan (NCDK) de pê aktîvîteyêke ameye yadkerdene. Keye û merdimê Sarya zî tewrê aktîvîte bîyî. Nameyê keyeyî ser o Huseyîn Hezer aktîvîte de qisey kerd û da zanayene ke Sarya Dîyar sey birayê xo Abdullah Hezero ke 2010 de hêrişê polîsanê tirkan de şehîd bibi, rayîrê têkoşînî weçîna. Hezerî ard ziwan ke ê do wayîrê mîrasê şehîdan vejîyê.

Paytextê Danîmarka Kopenhag de  rayberîya PJAK û KJARî de Şehîdê 9ê Gulane Şîrîne Elemhûlî, Ferzad Kemanger, Elî Heyderiyan û Ferhat Vekîlî bi aktîvîteyêke ameyî yadkerdene. Temsîlkarê xeylêk rêxistinan zî tewrê aktîvîte bîyî û polîtîkaya qirkerdişî ya Îranî şermezar kerde.

Paytextê Swêdî Stockholm de zî bi heman hawayî rayberîya PJAK û KJARî de Şehîdê 9ê Gulane Şîrîne Elemhûlî, Ferzad Kemanger, Elî Heyderiyan û Ferhat Vekîlî ameyî yadkerdene. Qiseykerdişan de ame vatene ke nê kesî sey sembolê azadîye yê Rojhelatê Kurdîstanî şinasîyenê û kurdî heta peynî do wayîrê têkoşînê înan vejîyê. Aktîvîte pê slogananê 'Bimiro rejîmo faşîst', 'Azadîye seba tepişteyanê sîyasîyan' qedîyaye.