Bajarê Bîelî yê Swîsre, paytextê Awusturya Vîyana û bajarê Munîhî yê Almanya de ê ke qirkerdişanê Sêwas û Çorumî de cuya xo vîne kerde ameyî vîrardene.

Bîel

Bajarê Bîelî yê Swîsre de rayberîya Federasyonê Elewîyan ê Demokratîkan (FEDA) de Dergahê ’’Reya Haq’’ î de aktîvîteyêk ameye organîzekerdene. Aktîvîte de mûmî ameyî tafînayene û  ê ke  qirkerdişanê Sêwas û Çorumî de cuya xo vîne kerde ameyî vîrardene. Temsîlkara FEDA Songul Çelîka ke aktîvîte de qisey kerd qirkerdişê dewlete yê vera Kurdan û Elewîyan ardî vîrî û vat heta qetilkerdan ra hesab nêro persayene do qirkerdişî dewam bikerê.

Vîyana

Paytextê Awusturya  Vîyana de zî  hetê FEDA ra aktîvîteyêk ameye organîzekerdene. Qiseykerdişan de ame vatene ke qirkedişî bi destê dewlete plankerde ameyî viraştene û derheqê qirkerdişê Sêwas û Çorumî de  sînevîzyonêk ame ramotene.

Munîh

Bi heman waştişî aktîvîteyêk zî bajarê Munîhî yê Almanya de ameye viraştene. Vîrardişo ke hetê FEDA ra ame organîzekerdene de  bi nameyê federasyonî Ayten Simsire bale ante polîtîkayê qirkerdişî û asîmîlasyonî yê dewlete yê vera Kurdan û Elewîyan ser û va: ‘’Qirkerdişê Dêrsim, Koçgîrî, Mereş, Çorum û Gazî heme bi heman zîhnîyet ameyî viraştene. Seba ke nê qirkerdişan de bêro têrî ganî mucadele bêro xurtkerdene. Pîr Alî Balî zî vat heta ke şar û îtîqatî azadîya xo dest nêfînê erjanê xo vînî kenê. Aktîvîte bi deyîşanê Ozan Delîl Xidirî qedîyaye.

Qirkerdişê Madimakî yê Sêwasî yo ke 2’ê Temmuz a 1993’î de bi destê dewlete ame viraştene de bi desan ronvîrî ameyîbî qetilkerdene. Qirkerdişê Çorumî  yo ke menganê Gulane û Temmuze yê 1980 vera mehleya Elewiyan ame destpêkerdene de goreyê doneyanê fermîyan tewr tay 57 kesî ameyî qetilkerdene û bi seyan zî birîndar bîyî.