Ewropa verê qerarê AKP û YSK’yî de razînêbîyayîşê xo ramot

Seba ke AKP’yî bi destê Heyetê Weçînitişî yê Berzî (YSK) weçînitişê Stenbolî betal kerd, Ewropa razînêbîyayîşêko çetin ramot.

Heyetê Weçînitişî yê Berzî (YSK) goreyê qerarê AKP’yî têgêra û 6’ê Gulane de weçînitişê Stenbolî betal kerd.

Temsîlkara berze ya Karanê Teberî û Polîtîkayanê Asayîşî Federîca Mogherînî û endamê Hîrabîyayîşî yê Komîsyonê Yewîya Ewropa Johannes Hahnî hemverê qerarî de reaksîyon da.

Mogherînî: Ganî Çimdarê Mîyanneteweyîyî Bêrê Dawetkerdene

Mogherînî vat ke “Bicaardişê prosesê weçînitişêkê azad û şeffafî hem seba demokrasîyan û hem zî seba têkilîyanê Yewîya Ewropa û Tirkîya xeylî muhîm o. Seba çimdarîya weçînitişo ke ameyo kerdene, kîşta Kongreya Rayberanê Herêmîyan ê Konseya Ewropa de ganî çimdarê mîyanneteweyîyî zî bêrê dawetkerdene.”

Sekreterê Pêroyî yê Konseya Ewropa Thorbjorn Jaglandî zî bi rayîrê vervatoxê xo vat ke qerarê Heyetê Weçînitişî yê Berzî (YSK) beno ke zirar bido bawerîya weçînitoxan.

Pîrî: Bawerî bi Weçînitişî Nêmenda

Raportora Parlamentoyê Ewropa ya Tirkîya Katî Pîrî zî serê Twîtterî ra fikrê xo ard ziwan û vat ke “Erdogan binkewtişî qebûl nêkeno û hemverê îradeyê şarî de vejêno. AKP’yî seba tekrarbîyayîşê weçînitişê Stenbolî YSK’yî rê zextî kerdî. No hal zî ramojneno ke bawerîya bi weçînitişî nêmenda.”

Schwabe: Maskeya Înan Kewte

Vervatoxê Polîtîkayanê Heqanê Merdiman ê Koma Meclîsî ya SPD’yî Frank Schwabeyî zî vat ke “Newekerdişê weçînitişê Stenbolî skandalêko pîl o û yeno na mana ke maskeya serekkomarê Tirkîya kewta.”

Hemsereko verên ê Partîya Keskan û endamê Meclîsê Federalî Cem Ozdemîrî zî vat ke “Yeno waştene ke muxalefetî perçe bikerê û rayanê Kurdan bigêrê. La hendî Kurdî Kurdê verênî nêyê. Erdogan û AKP kewtê panîkî mîyan.”