Dewleta tirke ya îşxalkere 19ê teşrîna peyêne ra nata bêmabên hêrişê Rojawanî kena. Warê mîyanneteweyî de nêrazîbîyayîşê vera hêrişanê ver dewam keno. Vervatoxê Karanê Teberî yê FDPyo ke şirîkê hukmatê Almanya yo, Ulrich Lechteyî hêrişê dewleta tirke yê vera Başûr û Rojawanê Kurdîstanî şermezar kerdî .

Lechteyî ard ziwan ke ê seba binkewtişê cerganê DAÎŞî şarê kurdî rê sipas kenê û vat: ''Ganî hêrişê dewleta tirke bêrê cigêrayene. Seba qedînayîşê hêrişanê vera kurdan ganî ma cade têbigêrê.''

Vervatoxê Karanê Teberî yê Partîya Çepe Gregor Gysiyî zî hesabê xo yê medyaya dîjîtale de vera qiseyanê Wezîrê Karanê Zereyî Feyserî nêrazîbîyayîşê xo mojna û vat: ''Tirkîya şerê xopawitişî nêkena. Endamêka NATOyî goreyê huqûqê mîyanneteweyî şer nêkerd.''

Hemserekê Partîya Keskan Omid Nurîpur û şirîkê bînî yê hukmatê Olaf Scholzî, Claudia Roth û Vervatoxê Karanê Teberî yê SPDyî Michale Rothî cewab bêda persanê serê hêrişanê Tirkîya.

Kombîyayîşê çapemenîye de Vervatoxê Wezîrîya Karanê Teberî Christopher Burgerî venga Tirkîya da û vat: ''Bi krîteran têbigêre û huqûqê mîyanneteweyî rê hûrmet bikere.''