Festîvala Kulturê Kurdan a Ewropa ya 32.  do 21ê êlule de bajarê Frankfurtî yê Almanya de bêro kerdene. Bi nameyê Komîteya Hazirîye ya Festîvale Aytene Kaplan û  Engin Severî semedê tewrbîyayîşê festîvale veng da.

Aytene Kaplan vat hazirîye festîvale qedîyaye û wina dewam kerd: ''Dewleta tirke bi destê PDKyî vera kurdan polîtîkayanê leyminan rayra bena. Dewleta tirke û PDK seba ke şerê leyminî û polîtîkayanê îşxalî binimnê kedkaranê Çapemenîya Azade hedef genê. Ma sey înîsîyatîfê cinîyan ke ziwan, kultur û nasnameyê xo pawenê ma do festîvala xo bikerê. Ma veng danê heme cinîyan ê kurdan ke semedê wayîrvejîyayîşê kulturê xo û vera polîtîkaya qirkerdişî wa bi veng û rengê xo  tewrê na festîvale bibê.''

Engin Severî zî nê vatî: ''Ma na festîvala xo ya 32. dîyarîya xoverdayîşê Zapî kerd. Ma pêro zanê ke gerîlayê azadîye vera îşxalkeran têkoşîno pîl kenê û derbanê giranan danê AKP, PDK, DAÎŞî ro. Nê semedî ra ganî heme welatperwerê ma tewrê festîvale bibê. Gerîlayî semedê şarê kurdî û merdimîye ganê xo danê. Ganî ma zî wayîrê gerîlayan bivejîyê û festîvale de moral bido ci.

Şehrîbanê Kurdî, Omer Gundî, Erdogan Emir, Hozan Zozan, Hozan Kawa û grûba Rastakî do tewrê programê festîvale bibê. Ma veng danê şarê xo ke wa bi kincanê xo yê herêmî û renganê xo tewrê festîvale bibo. Ma festîvale de sey hezeran kesan bibê veng Rayber Apoyî. Vera tecrîdê serê Rayberîye û hêrişanê vera Kurdîstanî ganî şarê ma hewtî ra heta hewtayî tewrê festîvale bibo. Ma 21.09. 2024î de Frankfurt Rebstockpark de şima pêrune pawenê."