Vizêr polîsan bajaranê Paris, Marsilya û Draguignanî yê Fransa de bi hewayêkê hemwextî eşt xeylêk keyeyanê kurdan û Merkezê Komelê Kurdan ê Demokratîkan ê Marsilya ser û xeylêk kesî destbend kerdî. Kurdîstanijan Paris, Montpellier û Evry de hêrişê polîsan ê vera kurdan bi çalakîyan protesto kerdî.

Paris de ciwanan pê pankarta ''faşîzmê Fransa û Tirkîya sey yewbînan o'' hukmatê Fransa protesto kerd û waşt ke embazê înan cade bêrê verdayene. Ciwanan veng da heme ciwananê kurdan ke wa vera hêrişanê sîyasîyan vejîyê meydanan.

Reyna Evryê Parisî de zî bi eynî waştişî çalakîyêke ameye kerdene. Çalakîye de pêvînayîşê Erdogan û Macronî yê menga adare ame virardene û ame vatene ke nê hêrişî tesaduf nîyê. Qiseykerdişan de veng dîya heme kurdanê ke Ewropa de yê, Rêxistinanê Komelê Sîvîlî û partîyanê sîyasîyan ke wa vera bêedaletîya ke kurdan rê bena nêrazîbîyayîş ramojnê.

Montpellier de zî kurdan serê beranê xo de dovîzê ''Macron ti sey Erdoganî dîktator nîyî. Bê şiktişê beranê ma zî ti eşkenê bikewê komeleyanê ma'' daliqnayî û hukmatê Fransa protesto kerd.