Serekkomarê Fransa Emmanuel Macronî roja sêşemeyî Qesra Elysee de Serekwezîrê Avusturya Sebastian Kurzî reyde pêvînayîş kerd û  babeta têkoşînê vera terorîzmî ercnaye. Wird rayberan dima bi beşdarîya serekwezîranê Almanya û Hollanda, Serekê Konseya Yewîya Ewropa Charles Michel û Sereka Komîsyonê Yewîya Ewropa Ursula Von Der Leyen reyde bi rayîrê video-konferansî kombîyayîşêk kerd.

Macronî kombîyayîşî ra dima eşkerayîye daye çapemenîye û îfade kerd ke hem Fransa hem zî welatê Yewîya Ewropa do pîya 'têkoşînê vera terorîzmî' û polîtîkaya koçberîye bîyarê ca.

Macronî ard ziwan ke koçberîye û têkoşînê vera terorîzmî sey ci nîyê la mabênê înan de 'têkilîyêke' esta.  Macronî vist vîrî ke hêrişê Nice hetê koçberêkê tunisijî ra ame kerdene û coka heqê multecîtîye yê Yewîya Ewropa îstîsmar beno.

Fransa teda kena ke Peymana Schengenî bêra vurnayene. Macronî da zanayene ke ganî hetê asayîşî ra peymane newe ra bêra ercnayene.

Macron îdîa keno Schengen sînoranê teberî bi hawayêkê qîmî nêpaweno. Avusturya zî na babete de paştî dana Fransa. Almanya zî pare kena ke mesele têna bi asayîşî yan zî polîtîkaya ceza çareser nêbena.