Wekîlanê Koma Dostanîya Kurdan Parlamentoya Ewropa de vera hêrişanê bi SÎHAyan ê dewleta tirke yê vera kurdan eşkerayîyêke daye.

François Alfonsi (Partîya Keskan a Ewropa), Andreas Schieder (Partîya Sosyalîstan a Ewropa), Nikolaj Villumsen (Çepgîrîya Yewîye ya Ewropa) û Temsîlkarê Îdareyê Xoserî yê Rojawanî yê Fransa Xalid Îsa tewrê eşkerayîye bîyî.

Temsîlkarê Îdareyê Xoserî Xalid Îsayî eşkerayîyê QSDyî vist vîrî û da zanayene ke Tirkîya 2019 ra nata vera Rojawanî 32 reyî pê çekanê giranan û 39 reyî pê ÎHA û SÎHAyan hêriş kerd. Îsayî vat: ''Nê hêrişan de 185 şerwanê QSDyî şehîd bîyî, 13 şerwanî birîndar bîyî, 17 sivîlî kişîyayî.''

François Alfonsiyî zî îfade kerd ke artêşa tirke û îqtîdarê Tirkîya sere de Sûrîye, Rojawan, Iraq û Şingal wazenê her warê kurdan îşxal bikera û vat: ''Nê hêrişî vera Ewropa gefê pîlî yê. Ganî Ewropa peynîya nê hêrişan bîyara û vera Tirkîya ambargoyî bîyara ca.''

Andreas Schiederî zî ard ziwan ke dewleta tirke Efrîn de pakîya etnîke kena û vat: ''Tirkîya qanûnanê mîyanneteweyîyan binpay kena û sûcanê şerî kena. Ganî vera Tirkîya tedbîrî bigêrîyê.''