Rojnameger Serdar Karakoç 23yê gulane de, waştişê Almanya ser o Hollanda de amebi destbendkerdene û dima zî tepişîyabi. Roniştişê dewa yê 24ê temmuze de do bêra qerardayene ke Karakoç teslîmê Almanya bêro kerdene yan ney.

Xeylêk kesanê sey rojnameger, sîyasetmedar û akademîsyenan waşt ke wa rojnameger Serdar Karakoç vera bidîyo ke o waştişê Almanya ser o Hollanda de tepişîyabi.

Hemserekê Partîya Newe ra Awankerdişî ya Sosyalîste Tuncay Yilmazî vat: ''Almanya hêrişanê dewleta tirke rê dewam kena. Ma do rayîr nêdê ke heqê merdiman bêrê binpaykerdene. Ma veng danê ke wa cade Karakoç vera bidîyo.''

Rojnameger Hayko Bagdatî vat: ''Ez şahîdê rojnamegerîya Karakoçî ya. Ez bi tûjî şermezar kena ke qelem, fikr û rojnamegerî merkezê Ewropa de raştê tedayan yenê.''

Akademîzyene Neşe Ozgen vat: ''Ganî Karakoç cade vera bidîyo. Ganî hêrişê vera sîyasetmedr û rojnamegeranê kurdan ê Ewropa cade biqedê.''

Hemşaredarê Agirî yê verênî Huseyîn Yilmazî vat: ''Kedkarê çapemenîye û terergirê demokrasîyî û haştîye ganî hetê Karakoçî de cabigêrê û vera nê îlegalîzmî tewirê xo bimojnê.''

Sosyolog Selîm Feratî vat: ''Ganî teslîmkerdişê Karakoçî bêro astengkerdene û na bêhuqûqîye bêra qedînayene. Ganî ma vera na kerde yew bibê.''

Sîyasetmedare Sîbele Yîgîtalp vat: ''Karakoç binê şertanê zehmetan de bi serran sey kedkarêkê çapemenîye xebitîya. Bira tepişîyayîşê ey nêna qebulkerdene. Wa cade Karakoç vera bidîyo.''

Rojnameger Fîraz Baranî vat: ''Almanya xo sey dewletêka demokratîke pênase kena la teslîmkerdişê rojnamegerêkî wazena. Ganî Almanya cade na xeletîye ra abigêra û Karakoç vera bidîyo.''

Çime: Yenî Ozgur Polîtîka