Rejîmê Îranî roja şemeyî Mohammad Mehdi Karami û Seyed Mohammad Hosseini îdam kerdî. Badê çalakîyanê vera qetilkerdişê Jîna Emînî pîya bi nê wird ciwanan hûmara kesanê ke ameyî îdamekerdene bîyî çar.

Bajarê Gentî yê Belçîka de seba ke Rojhelat û Îran de di ciwanî ameyî îdamkerdene, çalakîya protestoyî ameye kerdene.

Pîya bi rêxistinanê Partiya Jiyana Azad a Kurdistan û Komalên Jinên Azad a Rojhilatî muxalîfê partîyanê Rojhelat û Îranî zî tewrê çalakîye bîyî. Çalakîye de semedê kesanê ke serewedaritişê azadîye yê Îran de ameyî qetilkerdene mûmî ameyî tafînayene.

Rayraşîyayîşo ke sloganê Jin jiyan azadî ameyî berzkerdene, belçîkayijan zî pê çapikan paştî daye ci. Qiseykerdişan de paştî dîyayî şarê ke serewedarito û îdamkerdişê çalakwananê ke heqê xo yê demokratîkî şuxulnenê, ame şermezarkerdene.