Zafaneyê welatê Ewropa kewtî verê pêlê hewayê germî, meşte ra tepîya germî do zêdetir bibê. Îspanya de germ do bibo 42 dereceyî. Hetê bînî ra Almaya de zî dimayê 72 serran Hezîrane do hende germ bibo. Fransa de zî îmtîhanê qedênayîşê wendegehê mîyanênî yo ke do no hewte biameyêne viraştene rîyê germî rê ame taloqkerdene.

Pêlê germî yo ke Afrîka ra yeno

Pêlê hewayê germî yo ke Çolê Sehra yê Afrîka ra yeno Ewropa de bi sebebê germê zêdeyî. Xeylî welatanê Ewropa de rîyê germî ra kewtî rewşa alarmî, xeylî welatan de selahîyetdarî bi tedbîranê nêaleladeyan kenê ke zirarê germî kêm bikerê.

Rewşa Îspanya û Almanya

Almanya de dimayê Hezîrana 1947’î, ke Frankfurt de germ bibi 38,2 dereceyî, yeno vatene beno ke na Hezîrane de germ rekor bişikno û 38,2 dereceyan derbaz bikero. Hetê bînî ra goreyê Ajansê Meteorolojiyê Îspanya herêma wertêne, başûr û rojakewtena bakurî de germ beno ke bireso 40 dereceyan.

Fransa de îmtîhanî ameyî taloqkerdene

Serra 2003 de Ewropa de rîyê germî ra 70 hezar ra zêde kesî merdî. Yeno pawitene ke no hewte Fransa de herêmanê werte û  rojakewtene de germ zaf zêde bibo û teba Lyonî xeylî bajaran de germ do bireso 40 dereceyan. Rîyê germê zêdeyî ra îmtîhanê qedênayîşê wendegehê mîyanênî yo ke no Pancşeme û Îne de do biameyêne viraştene, taloqê 1 û 2’yê Temmuze bîyî.

Îngilistan de zî germî reyde yeno pawitene ke firtine werzo. Awusturya de zî yeno pawitene ke germ bireso 30 dereceyan. Welatanê  Îskandînavî de zî ewro germî dest pêkerd, Danîmarka û Swêd de zî germ do bireso 30 dereceyan.