Girewteyê verênî yê ÎRA’yî û îdarekerê Sînn Feînnî yê ke seba azadîya Îrlandaya Vakûre têkoşîn kerdo, ard ziman ke şarê Kurdî do qetî ser bikewo.

Antony Mcîntyre yo ke dewaya ÎRA’yî ra 18 serrî tewqîfkerde mendo, endamê Sînn Feînnî yê Parlamentoyê Komara Îrlandayî Orîen O Broîn û rayberdoxanê pêvînayîşanê Îrlandaya Vakûre ra Gerry Kellyî vat k ê têkoşînê şarê Kurdî nêzdî ra teqîp kenê.

FIKRÊ OCALANÎ BALA MA ANCENÊ

Girewteyo verên Antony Mcîntyre yo ke dewaya ÎRA’yî ra 18 serrî Lona Keshî (Hepisxaneyê Mazeyî) de ameyo pêgirewtene. Mcîntyreyo ke zerrîwazê ÎRA’yî yo, vejîyayîşê hepisxaneyî ra dima dest bi karê cigêrayîşan kerdo. Serra 1966’î ra dima hepisxaneyî ra vejîya û kitabê bi nameyê 'Good Friday: The Death of Irish Republicanism (Good Friday: Merdişê Komarparêzîya Îrlanda) nuşt. Mcîntyre hîna zî aktîvîst o û Dublinî de ciwîyeno. Mcîntyre têgêrayîşê şarê Kurdî reyde nêzdî ra eleqedar beno û teqîp keno. Mcîntyre ard ziwan ke, çalakîya Leyla Guvene û bi seyan girewteyan û ya Strasboûrgî bi baldarî nêzdî ra teqîp keno û ard vîrî ke, înan zî bi heman amancan bi serran hepsxaneyanê Îngîlîzan de têkoşîn dayo. Mcîntyre ard ziwan ke, şarê Kurdî do ser bikewo û vat, vera sîstemê kolonyalîsît, têkoşîno bi rêxistine û bi qerardarî muhîm o û vat,  fikrê Ocalanî bala înan ancenê û tewrê zaf çalakîyan ê ke na babete bîyê bîyo. Mcîntyre vat, ê do tim paştî bida Kurdan.

GANÎ MERDIM QERARDAR Û BISEBIR BO

Gerry Kellyo ke dewaya ÎRA’yî ra bi serran hepisxaneyê Mazeyî de mendo,  demanê cîyayan de nêzdî 200 rojî grevê vêşanîye de mendo û bi babeta fîlmanê fîrarî yê Mazeyî, înan ra yew keso ke rayberdoxê pêvînayîşanê haştîya Îrlandaya Vakûre yo. Kelly sîyasetmedarê Îrlandaya Vakûre yo ke  Gerry Adamsî reyde 'peymana haştîyê' îmze kerda. Kerry prosesê haştîye ra dima bi wezîr û nika zî hem parlementer o hem zî rayberdoxê berzî yê Sînn Feînî yo. Buroyê Sînn Feînî yê Belfastî de ANF’yî rê qsiey kerd. Kell ard ziwan ke, têkoşînêko derg û zehmetdarî ra dima înan destkewteyê muhîmî fînayî ra xo dest û ard vîrî ke, zaf kesan bawer nêkerdene ke ê do ser bikewê. Kellyî vat, şarê Kurdî zî sey şarê Îrlandaya Vakûre bi têkoşîn ser bikewe, la seba naye zî ganî biqerar û biseber bo. Kellyî ard ziwan ke, no proses asan xurt nêbeno,  şarê Îrlanda zî bi serran têkoşîn kerd û netîce de hemeyê dinya dewaya şarê Îrlanda ya biheqe qebûl kerde.

MA ŞARÊ KURDÎ  RA ZAF ÇÎYÎ MUSAYÎME

Endamê Sînn Feînî yê Parlamentê Komara Îrlanda Orîen o Broînî zî ard ziwan ke ganî waştişê çalakwananê grevê vêşanîye bêrê dayene. Breoînî vat, verê çend serran o şîyo Amed, tayê kesan reyde pêvînayîşî kerd û ard ziwan ke, o wext o Kurdan ra zaf çî musayo. Broînî bale ante ke şarê Kurdî zaf bîyo  birêxistin  û seba serkewtişî zî no zaf muhîm o. Breoînî vat, Sînn Feîn do tim paşîtdayîşê bido şarê Kurdî.

HEPISXANEYÎ MAZEYÎ

Hepisxaneyî Mazeyî: Hesisxaneyo kehen o ke Îrlandaya Vakûre de yo. Mabênê serranê 1971-2000'î zerrîwazê ÎRA’yî tede ameyêne pêgirewtene. Hepisxane bi 14 kîlometreyan başûrê rojawane yê Belfastî de yo. Hepisxaneyî Mazeyî têkoşînê Îrlanda Bakurî de wayîrê rolêko muhîm o. Grevê vêşanîye yê 1981'ê Hepisxaneyî Mazeyî de amey, destpêkerdene, gulbangêko berz vet. Hepisxane serra 2000'î de ame padayene.