Nobeta Azadîye ya ke 25ê hezîrana 2012î de bajarê Strasbourgî yê Fransa de semedê azadîya fîzîkîye ya Rayberê Şarê Kurdî Abdullah Ocalanî dîyaye destpêkerdene serra 10. de dewam kena.

Nobete hewteyê 472. de hetê grûba Hamburgî ra ameye dewrgirewtene. Grûba Hamburgî de Mesut Gundar, Gulete Polat û Îdrîs Savci ca genê.

Mesut Gundarî ke bi nameyê grûbe qisey kerd bale ante tecrîdê giranî yê Îmraliyî ser û vat: ''Rayberê ma verê çimanê dinya de 22 serrî yo binê tecrîdê giranî de yeno tepiştene. Na nobete de derheqê tecrîdî de zanayîş yeno dayene û fikrê Rayberîye  dîyene naskerdene. Ganî her kurd/e felsefeya Rayberîye nas bikero û esas bîgero.''

Gunerî hêrişê îşxalî zî vist vîrî û vat: ''Eke ma vera îşxal,tecrîd û qirkerdişan pîya têkoşîn bikerê ma eşkenê ser bikewê. Ganî ma pê yewîya neteweyîye cewabê hêrişê îşxalî yê dewleta tirke yê vera Başûrê Kurdîstanî bidê. Ma sey kurdan her ca de payra yê. Na çalakîya ke verê dezgehanê Ewropa de yena kerdene de des serrî yo cehdkerdene vengê kurdan bidîyo eşnawitene. Ma dirîyîya înan teşhîr kenê û vanê ke ma do peynî ra tewr peynî nê komployî bişiknê.''