Ciwano kurd Halîm Dener 26 serrî verê cû Hannover de wexto ke afîşî darde kerdêne hetê polîsê almanî ra ame qetilkerdene. Rixmê hende serran zî kişîyayîşê Denerî nêame roşnîkerdene û edalet nêame caardene.
Halîm Denero ke qezaya Dara Hênî ya Çewlîgî ra yo şerê Kurdîstanî û îşkence ra 1994 de şîyo Almanya. 30ê hezîrane de Hannover de Halîm wexto ke afîşê ERNKyî darde kerdêne polîsê almanî peyê ci ra gule eşt ci û Halîm şehîd bi. Halîm Dener o çax 16 serre bi û eke biciwîyayêne nika do 42 serre bibîyêne.
Polîs Klaus Y.yo ke Halîm qetil kerd endamê Tîma Polîsan a Taybete (TEK) bi. No serebût qet nêame roşnîkerdene. Dewaya hukmkerdişî ya Klausî Mehkemeya Eyaletî ya Hannoverî de 3 serran dewam kerd û dima 1997î de ame veradayene.
Kurd û dostê înan seba ke Dener nêro vîrakerdene û edalet bêro ca têkoşîn kenê. 2014î ra nata Kampanyaya Halîm Denerî her serre sergêra kişîyayîşê ci de merasîmê yadkerdişî serûber kena. Merasîmê emserî Meydanê Steinterî de 30ê hezîrane de saete 19:00 de do dest pêbikero.
Kampanyaya Halîm Denerî de partî û komunê sey IL (Interventionistische Linke), Rote Hilfe, Antifaschistische Gruppe Hannover, Die Linke, Keskî estê. Ronayoxanê kampanya ra Ayfere Kahraman vat: ''Ma armanc kenê ke Halîm Dener seke ey heq kerdo, yad bikerê, vîrameyîşê ey ganî biverdê, edalet bîyarê ca.''
Ayfere Kahraman venga her kesî da ke tewrê kampanya bibo.
