Hamburg de semedê sîyasetmedar Kenan Ayazî verê zîndanê ke tede yeno tepiştene de, çalakîya paştdayîşî ameye kerdene. Çalakwanan vat, “Bedelê ci çi beno wa bibo, ma zî do hemrayanê xo û erjanê ke ê pawenê, bipawê.”
Semedê sîyasetmedarê kurdan Kenan Ayazî yo ke Qibris de ame tepiştene û Almanya rê ame îadekerdene verê Zîndanê Damtorî yê Hamburgî de mîtîngê paştdayîşî ame kerdene.
Mîtîngo ke hetê Înîsîyatîfê Kenan Ayazî rê Azadîye ra ame organîzekerdene, xeylêk kurdî û dostê almanî tewrê ci bîyî. Mîtîng de semedê şehîdanê Kurdîstanî û şorişê dinya rêz ame girewtene û pankartê “Krîmînalîzasyonê vera kurdan rê bes o, Kenan Ayazî rê Azadîye” ame akerdene.
Pawitoxanê heqanê merdiman Anja Flach mîtîng de qisey kerd û ard ziwan ke Kenan Ayaz û sîyasetmedarê kurdan ê bînî yê ke zîndananê Almanya de yenê tepiştene, bîyî qûrbanê menfeatê leşkerî û ekonomîkî yê Almanya û dewleta tirke û vat çîyo winayê çirey nîno qebulkerdene.
Hemserekê Merkezê Komelê Demokratîkî yê Kurdan ê Hamburgî Murat Çewlîgî zî vat, “Kurdî û dostê înan do tim semedê Kenan Ayaz û tepişteyanê bînan çalakîyan bikerê. Bedelê ci çi beno wa bibo, ma zî do hemrayanê xo û erjanê ke ê pawenê, bipawê.”
Mîtîng de sloganê sey “Tepişteyê sîyasîyî rumetê ma yê, “Wa biciwîyo xoverdayîşê zîndanan”, “Heme tepişteyanê sîyasîyan rê azadîye” ameyî vatene. Tepişteyan ê kurdan zî zîndanî ra sloganî vatî.
