KCKyî 12ê êlule de Hemleya 'Tecrîd, Îşxal, Faşîzmî rê Bes o; Wext Wextê Azadîye yo' daye destpêkerdene. Paytextê Almanya Berlin de bi kombîyayîşê çapemenî hemle dîyeye eşnawitene. Kombîyayîşo ke verê Meclîsê Federalî de ame kerdene de waştişê azadîya Rayberê Şarê Kurdî Abdullah Ocalanî morê xo da piro.

Kombîyayîşo ke hetê KCDK-E ra ame oganîzekerdene her hetê dinya ra sîyaset medar, pawitixo heqanê merdiman û temsîlkarê komelê sîvîlî tewrê ci bîyî. Bi rayîrê vîdeoyan mesajî ameyî dayene.

Kombîyayîşî de sere de KCDK-E,  temsîlkaranê  TJK-E, KON-MED, Partîya Komînîste ya Kurdîstanî, Partîya Çepe ya Almanya û CÎKî derheqê muhîmîya hemle de qisey kerd û mesajê wayîrvejîyayîşê hemle û pîlkerdişê têkoşînî dayî.

Mesajê ke ameyî dayene tayî winayê:

Ramon Mantovani (Parlamentero verên ê Italya): Hemra Ocalan têna rayberê şarê kurdî nê eynî wextê de refaransê şaranê bindestanê şorişgêr û demokratan o. Ocalan merdimê haştîye yo. Coka ganî heme têgêrayîşê demokrat û şorişgêrî azadîye ey biwazê.

 

Arturo Salerni (Avûkatê Ocalanî yo italyan): Ocalan rayberê şarêkî yo wayîrê perspekfê xurtî yo ke Rojawan de ame dîyene. Tecrîdê serê ey nîno qebulkerdene. Rewşa Ocalanî têna meseleya Kurdîstan û Tirkîya nîya, eynî wextî ya Ewropa ya. Coka ganî heme hetê eleqadarî semedê azadîya Ocalanî têbigêrê.

 

Baroness Christine (Endamê Kamraya Lordan ya Britanya û Hemserekê Kampanaya Ocalanî rê Azadîye): Heta ke Ocalan azad nêbo mesalya kurdî nîna çareserkerdene. Senî ke MaNdelayî xeylêk reyî vat: Heta ke ma heme azad nêbê, ma qet yew zî azad nîyê.‘‘

Simon Dubbins (Dîrektorê Mîyanneteweyî yê sendîkaya Unite û Hemserekê Kampanaya Ocalanî rê Azadîya): Ma reyna vengdayîşê xo yê azadîya OcAlanî newe kenê. Wextê newe ra destpêkerdişê prosesê haştîye zî ameyo. Tewrê ma bibê ma têkoşînê xo pîlêr bikerê.

Anna Maria (Huqûqnas û femînîste): Tecrîdê serê birêz Ocalanî bipaykerdişê heqî yo. Wextê haştîye û wereameyîşî yo û semedê naye rolê Ocalanî muhîm o.

Ohiana Etxebarieta (Sereka Meclîsê Grûba Dostîye ya Kurdan a Baskî): Ma tecrîdê serê Abdullah Ocalanî û polîtîkaya hêrişkare ya Tirkîya şermezar kenê. Seba ke haştîye bêro Rojhelatê Mîyanênî ganî Ocalan azad bo.

 

Villo Sigurdsson (Şaredaro verên ê Kopenhagî): Tirkîya de demokrasî çîn a, dîktatorîye esta. Sîyasetmedarê û şarê kurdî, rojnameger û muxalîfî zîndan de yê. Abdullah Ocalan 21 serrî yo zîndan de binê îzolasyonî de yo. Ganî Yewîya Ewropa û Danîmarka Tîrkîya rê zext bikerê ke nê şertî werte ra bêrê wedaritene.

Pernille Frahm (Parlamentera verêne ya Partîya Sosyalîste ya Şarî): Ganî cade nika tecrîdê serê Ocalanî bêro wedaritene.

 

Solly Mapaila (Hetkarê Serekê Partîya Komînîste ya Afrîkaya Başûre): Ez rayberê ma Ocalanî selam kena. Sey rayberê ma Nelson Mandela fîkr û vîzyonê Ocalanî zî bi esaretî nînê şiktene.

Mahmoud Partel (Serekê Rêxistina Çalakîya Heqanê Merdiman ê Kurdan ê Afrîkaya Başûre): Ganî Tirkîya cade Abdllah Ocalanî serbest verado ke huzur bêro herême.

 

Benny Gustafsson (Serekê Înîsîyatîfê Paştdayîşê Kurdîstanî): Ma komelê mîyannetewey, Konseya Ewropa, Yewîya Ewropa û CPTyî ra wazenê ke wa Tirkîya rê zext bikerê  tecrîdê serê birêz Ocalanî bêro wedaritene û reyna prosesê haştîye bêro destpêkerdene.

 

Erling Folkvord (Parlamentero verên ê Norveçî): Ganî tecrîdê serê Ocalanî cade bêro wedaritene  û semedê çareserîye muzakereyê sîyasîyî newe ra bêrê kerdene.

 

Peter Boyle (Rojnameger /Awusturalya): Ocalan hetê rejîmê tirkî ra ame remnayene û bi tewirê teberê merdimîye ame hepskerdene. No îşkence yo. Têna semedê naye bimano zî ganî bêro veradayene. Reyna semedê ameyîşê azad û demokratîkî yê merdimîye ganî Ocalan serbest bo.

 

Dr Alex Wilson (Kanada): Ocalan de hendê dinya vîzyonî estî. Rojhelatê Mîyanênî de femînîzm, ekolojî û sosyalîzm vila kerd.Coka ganî welatê Rojhelatê Mîyanênî azadîya ci ser vinderê.