Rêxistina Weşîye ya Dinya (WHO) bi wesîleya kombîyayîşê berzî yê awhewayî (COP27) yê Misirî derheqê mergê germî yê Ewropa de texmînê xo pare kerdî.

Hamnan de bi pêlê germî germîya hewayî resabî asta rekorî. Xeylêk cayan de adir kewtbî daristanan.

Mudirê WHOyî yê Ewropa Hans Klugeyî eşkerayîyêke weşanaye û vat: ''Goreyê doneyanê neteweyîyan yeno texmînkerdene ke serra 2022yî de 15 hezar merdimî germî ra merdê.''

Klugeyî pare kerd ke Almanya de 4500 kesî, Spanya de 4000 kesî, Brîtanya de 3200 kesî û Portekîz de zî tewr tay hezar kesî germîye ra merdî û beno ke na bîlanço giranêr biba.

Goreyê doneyanê WHOyî mîyanê 50 serranê peyênan de Ewropa de 148 hezar kesî germî ra merdî.

WHOyî vat: ''Vurîyayîşê îklîmî xora ma kişeno la ewro bi çalakîyêka xurtêre beno ke verê zêdîyayîşê mergan bêro girewtene.''

Goreyê raporêkê Neteweyanê Yewbîyayeyan mîyanê hîrê serranê peyênan de nîsbetê germîye 2 qatan zêdîyayo.