Heilbronnî de polîsan eşt keyeyanê îdarekaranê komeleyan ê kurdan ser. Gore zanayîşan çarşeme saete 06:30î de polîsan îdarekarê FCKyî kerdî hedef.

Saît Ozturkî yo ke polîsan eşt keyeyê ci ser ard ziwan ke gama ke o  serê sibayî  karî ra şîyêne keye,  verê keyeyî de polîsî dîyî û vat: ''Senî ke ez kewte zere polîsî zî mi ra dima ameyî. Semedê xebatanê PKKyî û xebatanê komeleyan keyeyê mi de cigêrayîş kerd. Ozturkî vat polîsan dest na telefonê ey ê mobîlî, kompîterê ci, kitaban û dokumentê derheqê federasyonî de ser.

Derheqê îdarekaranê bînan ê ke keyeyê înan ameyî sereştene de zanayîşî nêameyî girewtene.

Par zî Heilbronnî de polîsan eştbi Merkezê Komelê Kurdan ê Demokratîkî û zaf dezgehan ser û 6 ciwanê kurdî amebî destbendkerdene. Federasyonî vera naye tewir mojnabi û venga Hukmatê Almanya dabi ke hemkarîya xo ya bi Dewleta Tirke biqedîno.