Ewropa de şayîyê fîrazkerdişê Roşanê Ganîbîyayîşî dewam kenê. Vizêr Bajarê Helsinborgî yê  Swêdî de kurdistanijan û dostanê înan serrgêra 42ine ya ronayîşê PKKyî fîraz kerde.

Salona şayîye bi posterêkê girdî yê Rayberê Şarê Kurdî Abdullah Ocalanî û beyraqanê YPG û YPJyî ameye xemilnayene. Aktîvîte de verî Hemsereka Merkezê Komelê Kurdî yê Demokratîkî Amara Stevrî qisey kerd û bale ante muhîmîya têkoşînê PKKyî ser. Dima sîyasetmedar Abdullah Devecîyî qisye kerd. Devecîyî vist vîrî ke PKKyî bi bedelanê girdan kurdî senî kerdî hêzo gird û bale ante hêrişanê dewleta tirke yê vera Başûr û Rojawanî ser. Devecîyî vat eke kurdî pîya têbigêrê û paştî bidê yewbînan do ser bikewê. Hunermendê kurdî Xelîl Xemgîn, Dîyar Dersimî û Şîyar zî bi deyîranê xo reng da şewe.