Çalakîyanê 1ê Êlule Roja Haştîye ya Dinya de hêrişê îşxalî yê dewleta tirke ameyî şermezarkerdene.

Şaristanê Londonî yê Îngilîstanî de Meclîsê Şarê Kurdî, rêxistinê elewîyan, Merkezê Kulturî yê Bi Seyan Gulan û GÎK-DERî zî tede Yewîya Hêzê Demokratîkî çalakîyêke kerde. Çalakîye de alaya YPG û YPJyî û fotografê Rayberê Şarê Kurdî abdullah Ocalanî ameyî kiriştene. Çalakîye de ame waştene ke wa Îngilîstan paştî nêdo dewleta tirke. Çalakîye de derheqê sûcanê dewleta tirke de vilawekî ameyî vilakerdene.

Şaristanê Zurihî yê Swîsre de vengdayîşê SDK-S û YJK-Syî ser o çalakîyêke ameye kerdene. Çalakîye de hunermend Kawa Ûrmîyeyî qisey kerd û venga pêro hunermend û roşnvîranê kurdan da ke wa wayîrê têkoşînê azadîye vejîyê.

Şaristanê Cenevre yê Swîsre de partî û dezgehanê Swîsre û koçberan standêk rona. Kurdîstanijî bi renganê xo tewrê çalakîye bîyî û seba çareserîya demokratîke ya meseleya kurdan waştişê xo ardî ziwan.