Hêrişê dewleta Tirkî ameyî şermezarkerdene

Vera îşxalê dewleta Tirkî yê vera Başûrê Kurdistanî û hêrişanê hewayîyan ê hemverê Kampa Koçberan a Mexmûrî xeylî welatanê Eweopa de çalakîyî ameyî viraştene.

Hêrişê dewleta Tîrkî ya Îşxalkare yê vera Başûrê Kurdistanî û Kampa Mexmûrî Almanya, Hollanda, Swed û xeylî bajaranê bînan ê Ewropa de ameyî şemerzarkerdene.

Bremen

Seba şermezarkerdişê îşxalê dewleta Tirkî yê Başûrê Kurdistanî û hêrişanê hewayîyan yê hemverê Kampa Koçberan a Mexmûrî bi vengdayîşê Konfederasyonê Cimatan ê Kurdistanîyan ê Almanya (KON-MED) bajarê Bremenî de çalakîyêka protestoyî virazîyaye. Kurdistanijê ke Bremen û Oldenburg de yê pîya bi dostanê xo tewrê çalakîye bîyî. Çalakgeran razînêbîyayîş ramot hukmatê Başûrê Kurdistanî û vat, “Destûrdayîşê kişîyayîşê domananê xo û pêşkêşkerdişê erdê xo Birakujî ya.”

Frankfurt 

Bi amacê şermezarkerdişê hêrişê serê Başûrê Kurdistanî îstasyona trêne ya merkezî ya Frankfurtî de mîtîngêk ame viraştene. Mîtîng de ame vîrvistene rîyê hêrişanê dewleta Tirkî ra xeylî sivîlan cuya xo vînî kerda û bêvengîya hukmatê Başûrê Kurdistanî û Iraqî amî şermezarkerdene. Mîtîng de veng dîya sazîyanê mîyanneteweyîyan ke hemverê hêrişanê dewleta Tirkî de bikewê mîyanê têgêrayîş û cigêrayîşî.

Stuttgart

Bajarê Stuttgartî de hemverê hêrişanê îşxalî yê dewleta Tirkî yê serê Başûrê Kurdistanî, Lautenschlagerstrasse ra heta Kronprintz-platz rayraşîyayîşêk ame kerdene. Çalakîye de pankarta bi nuşteyê “Bimiro xîyanet” amî kiriştene.

Stockholm

Hêrişê dewleta Tirkî bajarê Stockholmî yê Swêdî de zî ameyî şermezarkerdene. Kurdistanijî bi nê amacî meydanê Sergelstorgî de cemêyayî û pankartê sey „Hemverê teror û faşîzmî de bibê yew“, “Erdogan kiştoxê domanan o” ameyî kiriştene. Ayşe Goktepe bi nameyê çalakgeran qisey kerd û krîtîkê çetinî Neteweyê Yewbîyayeyî û Yewîya Ewropa rê kerdî ke hemverê hêrişan de bêveng ê. Heman wextî de vat îdareyê PDK’yî, dewleta Iraqî û welatê rojawanijî yê ke hemverê hêrişan de bêveng ê hemparê qirkerdişan ê. Goktepe veng da cimatê mîyanneteweyîyî ke hemverê hêrişanê îşxalî yê serê Başûrê Kurdistanî de vengê xo berz kero.

Den Haag

Teşebusê dewleta Tirkî yê îşxalkerdişê Başûrê Kurdistanî bajarê Den Haagî yê Hollanda de ame şermezarkerdene. Kurdistanijê ke verê awanîya parlamentoyî de cemêyayî hêrişê dewleta Tirkî yê hemverê Rojawan û Başûrê Kurdistanî şermerzar kerdî. Çalakîye de vilawekê bi ziwananê Felemenkî û Îngilîzkî ameyî vilakerdene.