Kurdîstanijî seba şermezarkerdişê hêrişanê dewleta tirke vejîyayî meydanan û înan pare kerd ke hêrişê îşxalî do pê şarê kurdî nêeşkê.

Den Haag

Şaristanê Den Haagî yê Hollanda de pê çalakîyêke hêrişê dewleta tirke ameyî şermezarkerdene. Çalakîkeran da zanayene ke ê do roja çarşemeyî saete 16:00 de verê Parlamentoya Hollanda de newe ra kom bibê.

Viyana

Paytextê Avusturya Viyana de kurdîstanijan û dostanê înan çalakîya xo de vilawekî vila kerdî û rayîrê trafîkî 15 deqayan ameyî girewtene.

Saarbrucken

Şaristanê Saarbruckenî yê Almanya de hêrişê dewleta tirke yê vera Herêmanê Pawitişî yê Medya, Şingal û Mexmûrî ameyî şermezarkerdene. Qiseykerdişan de ame îfadekerdene ke nê hêrişî vera yewîya kurdan ê la dewleta tirke do pê kurdan nêeşkê.

Strasbourg

Şaristanê Strasbourgî yê Fransa de hêrişê dewleta tirke yê vera Herêmanê Pawitişî yê Medya, Şingal û Mexmûrî ameyî şermezarkerdene. Çalakîye de venga şarê Fransa ame dayene ke paştî bido şarê kurdî.

Berlin

Kurdîstanijî verê Sersefîrîya Berze ya Tirkîya de kom bîyî û hêrişê dewleta tirke yê faşîste protesto kerdî. Çalakîye de wekîlê Partîya Çepe Die Linke Hakan Taşî vat: ''Rejîmê Erdoganî her ke bin keweno hêrişê Kurdîstanî keno. Ma nê hêrişan şermezar kenê.''

Bielefeld

Şaristanê Bielefeldî yê Almanya de kurdîstanijan çalakîya xo ya vera hêrişanê dewleta tirke de vilawekî vila kerdî. Aktîvîstê Antifa û FFFyî zî tewrê çalakîye bîyî.

Hamburg

Şaristanê Hamburgî yê Almanya de pê nawnayîşêk hêrişê dewleta tirke yê vera Şingal, Herêmanê Pawitişî yê Medya û Mexmûrî ameyî şermezarkerdene. Nawnayîş de Yewîya Hêzî ya Demokratîke ya Hamburgî ra Hatîce Dersim qisey kerd û vat ke ê do peynîya teda û şîdetê Erdoganî bîyarê.

Swêd

Şaristananê Goteborg, Orebro, Helsinborg û Malmoyî yê Swêdî de zî kurdîstanijî û dostê înan vejîyayî meydanan û înan hêrişê dewleta tirke ya kolonyalîste yê vera Mexmûr, Herêmanê Pawitişî yê Medya û Şingalî pê çalakîyan protesto kerdî. Xeylêk dezgeh û rêxistinê kurdan tewrê çalakîyan bîyî û pê sloganan hêrişê dewleta tirke şermezar kerdî.