Hemşaredaro verên ê Cenevre Rémy Paganî ke sey emdanê Heyetê Haştîye bajarê Hewlêrî yê Başûrê Kurdîstanî de raştê astengkerdişê PDKyî amebi, vizêr resa Cenevre.

Rémy Paganî pîya bi Parlementerê Partîya Karkeran Tobias Casimir Schnebli yo ke Heyetê Haştîye de ca geno eşkerayîya çapemenîye daye.

Paganî vist vîrîke  dewleta almanî bi baheneyê janî destûr nêda endamê Heyetê Haştîye Frankfurtî ra şirê Hewlêrî û vat: ''Ma zî seba ke bêrê astenkerdene raştê karê prosedurî ameyî. Bado ke ma resayî Başûrê Kurdîstanî PDK bi nêzdîbîyayîşî dişmenkîyî armancê ameyîşê ma persa. Wezîrê Karanê Teberî zî di rey mi zîyaret kerd. Vera waştişê haştîye nêzdîbîyayîşê winayên ma qebul nêkenê. Ma vera qirkerdişo ke yeno waştene vera şarê kurdan bêro caardene, waştişê haştîye de do israr bikerê. Demo tewr kilm de sey Delegasyonê Haştîye ma do reyna şirê Başûrê Kurdîstanî.''

Tobias Casimir Schnebliyî zî vat: ''Ma vera hêrişê îşxalî û qirkerdişî yê dewleta tirke şîyî Başûrê Kurdîstanî ke semedê haştîye çîyêk bikerê. Ma bi waştişê haştîye şîyî la uca sey dişmenî nêzdîyê ma bîyî. Ez nayî rê eceb menda. Bi nê tewirî yeno waştene ke xoverdayîşê şarî yê vera îşxalê vera Başûrê Kurdîstanî bêro nimitene. Hêrişê vera Kampa Multecîyan a Mexmûrî de sîvîlî yenê qetilkerdene. Verê çimanê dinya de hêrişê qirkerdişî yeno kerdene. Ma do vera nayî xoverdayîşê enternasyonalîstî xurt bikerê. Wa mavacê qey na rewşe ma rê peyser game dana eştene, ma do vera hêzanê îşxalî û hemkaranê ci paştdayîşê enternasyonalîstî bidomnê.''