Heyetê Meclîsê Sûrîyeya Demokratîke (MSD) çar rojan ra nata paytextê Îngilîstanî London de zîyaretanê dîplomatîkan keno. Temsîlkarê Têkilîyanê Mîyanneteweyîyan ê MSDyî Hassan Muhammed Alî û Hemsereka Îdareyê Rayberdişî yê MSDyî Îlhame Ehmed tewrê panel û aktîvîteyan bîyî. 

Heyetê MSDyî nê zîyaretan de selahîyetdaranê hukmatê Partîya Karkeran, sendîkayan, dezgehanê fikrî û têgêrayîşanê Kurdîstanî de ronişt. 

Îlhame Ehmed Wekîlê DUBî Sammy Wilsonî de ronişte. Îlhame tîya de pare kerd ke ganî vera hêrişan Îdareyo Xoser bipawîyo û tedaya dewleta tirke bêra kerdene ke hêrişanê xo biqedîna. Îlhame da zanayene ke ganî hukmatê neweyî yê Sûrîye rê zî teda bêra kerdene ke sozanê xo bîyaro ca.

Wilsonî dîyar kerd ke o amade yo ke heyetêkî reyde Rojawanê Kurdîstanî zîyaret bikero.

Wekîlê Partîya Muhafazakere û wezîrê verênî Hon Andrew Mitchellî de zî pêvînayîş ame kerdene.

Sîyasetmedar Osman Baydemîrî û Wezîra Teknolojî ya Îngilîstanî Feryale Clark Demîrcî zî heyetî reyde pêvînayîş de cagirewt. 

Dima Otêla The Savoyî de bi wesîleya serrgêra desine ya azadkerdişê Kobanê aktîvîte û resepsîyonêk ameyî kerdene. 

Aktîvîte rê Fermandarê Pêroyî yê QSDyî Mazlûm Ebdîyî zî mesaj şawit û vat: ''Ewro ganî ma vengê xo hîna pêtî vejê, vajê ke hinî bes o. Ma Sûrîyeyêka winayêne wazenê ke tede cinîyî azad ê, pêro şaran temsîl kena.''

Îlhame Ehmed zî vat ke ê Sûrîye de îdareyêkê federalî wazenê.

Sendîkaya UNITE ra Simon Dubbinsî, Feryale Clark Demîrcî, wekîl Gavin Willaimson, Lord Maurice Glasmanî zî qisey kerd û înan vat ke QSD aramîya pêro herême paweno.

Simon Dubbinsî qiseykerdişê xo de azadîya Rayber Apoyî waşte.

Dima girseyî bi deyîranê Koma Amedî govende girewte.

Ewro zî pêvînayîşê heyetê MSDyî do dewam bikerê.

Hassan Muhammed Alîyî ANFyî rê qalê pêvînayîşan û zîyaretan kerd û vat: ''Dewleta tirke seke qesasê DAÎŞî gêna hêrişê Rojawanî kena. Nê prosesî de pawitişê Kobanê bi taybetî girîng a. Ganî hêrişê vera Kobanê cade bêrê vindarnayene. Îngilîstan seba ke hêrişê Tirkîya vinderê pêvînayîşan keno. 

 Îngilîstan seba nasnameyê ci yê sekulerî û demokratîkî MSDyî xo rê nêzdî vîneno. Xora Tirkîya zî bi ney qayîl nîya. Tirkîya wazena ke no meclîs vila bibo. Dewleta tirke kena ke awankerdişê Sûrîyeya newîye de tesîrê ma bişikna. Ma tîya de vat ke seba pawitiş û destekê bi QSDyî wa Îngilîstan têbigêro.''